ភ្នំពេញ ៖ យោងតាមច្បាប់ស្តីពីរបបសន្តិសុខសង្គម ទៅថ្ងៃអនាគត បុគ្គលស្វ័យនិយោជន៍ ក៏នឹងទទួលនូវរបបផ្នែកប្រាក់សោធន ដូចគ្នាទៅនឹងកម្មករនិយោជិត ក៏ដូចជាមន្រ្តីរាជការដូចគ្នាដែរ ខណៈបច្ចុប្បន្នបុគ្គលស្វ័យនិយោជន៍ ទទួលបានរបបផ្នែកថែទាំសុខភាព និងប្រាក់បំណាច់មាតុភាព។

ឯកឧត្តមបណ្ឌិត ហេង សុផាន់ណារិទ្ធ អគ្គនាយករង និងជាអ្នកនាំពាក្យបេឡាជាតិសន្តិសុខសង្គម បានមានប្រសាសន៍ប្រាប់ទូរទស្សន៍ព័ត៌មាន ប៊ីធីវី នៅព្រឹកថ្ងៃទី១៥ ខែសីហានេះថា ចំពោះរបបសន្តិសុខសង្គមសម្រាប់បុគ្គលស្វ័យនិយោជន៍ សំដៅដល់ជនដែលប្រកបការងារ ឬមុខរបររកចំណូលផ្ទាល់ខ្លួន ដោយមិនពាក់ព័ន្ធនឹងប្រាក់ឈ្នួល ឬប្រាក់បៀវត្សដែលផ្តល់ដោយនិយោជក ឬរដ្ឋតាមកិច្ចសន្យាការងារ ហើយក៏មិនមានប្រើប្រាស់កម្មករ និយោជិតនៅក្នុងសកម្មភាពការងារ ឬមុខរបររបស់ខ្លួន។ យោងតាមច្បាប់ស្តីពី របបសន្តិសុខសង្គម ទៅថ្ងៃអនាគតពួកគាត់នឹងអាចទទួលបាននូវរបបប្រាក់សោធនផងដែរ ដោយលក្ខខណ្ឌបែបបទ និងនីតិវិធីបែបណានោះ ត្រូវរង់ចាំការសិក្សាកម្រិតបច្ចេកទេស និងការសម្រេចចុងក្រោយពីប្រមុខរាជរដ្ឋាភិបាល។

ឯកឧត្តមអគ្គនាយករង បានបញ្ជាក់បន្ថែមថា គិតត្រឹមថ្ងៃទី១៤ ខែសីហា ឆ្នាំ២០២៣ បុគ្គលស្វ័យនិយោជន៍ទូទាំងប្រទេស ដែលបានស្នើសុំធ្វើប័ណ្ណ ប.ស.ស តាមរយៈរបបភាគទានស្ម័គ្រចិត្ត មានការកើនឡើងចំនួនជាង ២៤ ០០០នាក់។ ក្នុងនោះ អាជីវករ មានចំនួនច្រើនជាងគេ គឺជាង ១៣ ០០០នាក់, អ្នករត់កង់បី ចំនួនជាង ៣ពាន់នាក់, ជាងសំណង់ ចំនួនជាង ១ ៥០០នាក់ និងផ្សេងៗទៀត។

 ពាក់ព័ន្ធការស្នើសុំធ្វើប័ណ្ណ ប.ស.ស របស់បុគ្គលស្វ័យនិយោជន៍នេះ ប្រជាពលរដ្ឋមកពីតំបន់ផ្សេងៗគ្នា បាននិយាយដូចគ្នាថា បណ្ណ ប.ស.ស នេះ ពិតជាមានសារៈសំខាន់ណាស់ដល់ពួកគាត់ ក្នុងការជួយកាត់បន្ថយចំណាយក្នុងជីវភាពគ្រួសារ ជាពិសេសនៅពេលដែលពួកគាត់មានបញ្ហាសុខភាព និងតម្រូវឲ្យព្យាបាល និងថែទាំ។ ពួកគាត់ បានលើកឡើងទៀតថា ប្រសិនបើថ្ងៃអនាគត នឹងទទួលបាននូវរបបប្រាក់សោធនទៀតនោះ ពួកគាត់កាន់តែសប្បាយចិត្ត និងរស់នៅដោយភាពកក់ក្តៅក្នុងប្រទេសដែលមានសុខសន្តិភាពពេញលេញ។

ដើម្បីមានសិទ្ធិទទួលប័ណ្ណសមាជិក ប.ស.ស. បុគ្គលស្វ័យនិយោជន៍ ត្រូវអនុវត្តតាមលក្ខខណ្ឌរួមមាន៖ ត្រូវមានមុខរបរមានប្រាក់ចំណូលផ្ទាល់ខ្លួន មិនពាក់ព័ន្ធនិងប្រាក់ឈ្នួល, ធ្វើការងារ ឬប្រកបរបរអាជីវកម្មផ្ទាល់ខ្លួន ដោយមិនប្រើប្រាស់បុគ្គលិក, ត្រូវមានអាយុមិនលើសពី៦០ឆ្នាំ គិតត្រឹមកាលបរិច្ឆេទស្នើចុះបញ្ជីនៅ ប.ស.ស. និងសាមីខ្លួនត្រូវអញ្ជើញមកស្នើសុំធ្វើប័ណ្ណ ប.ស.ស. ដោយផ្ទាល់ និងភ្ជាប់ជាមួយនូវអត្តសញ្ញាណប័ណ្ណសញ្ជាតិខ្មែរច្បាប់ដើម៕ ដោយ ៖ បូរ៉ាវី