ភ្នំពេញ៖ អគាររដ្ឋបាល និងសមទ្ធិផលនានា របស់មូលដ្ឋានកងរាជអាវុធហត្ថក្រុងប៉ោយប៉ែត ខេត្តបន្ទាយមានជ័យ តម្លៃជាង៥៧ម៉ឺនដុល្លារអាម៉េរិក បានសម្ពោធជាផ្លូវការ ក្រោមអធិបតីភាព ឯកឧត្តមនាយឧត្ដមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងមេបញ្ជាការកងរាជអាវុធហត្តលើផ្ទៃប្រទេស។

នៅក្នុងពិធីសម្ពោធ កាលពីព្រឹកថ្ងៃទី១៥ ខែសីហា ឆ្នាំ២០២៣នេះ លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត បានឱ្យដឹងថា ការសាងសង់អគាររដ្ឋបាលថ្មីនេះ គឺដើម្បីលើកកម្ពស់ប្រសិទ្ធភាពការងារឲ្យមានភាពងាយស្រួល ក្នុងការបំពេញភារកិច្ចការពារសន្តិសុខ និងរក្សាសណ្តាប់ធ្នាប់សាធារណៈជូនប្រជាពលរដ្ឋក្នុងមូលដ្ឋាន។

នាឱកាសនោះ ឯកឧត្តម សៅ សុខា បានថ្លែងនូវការកោតសរសើរដល់កងរាអាវុធហត្ថខេត្តបន្ទាយមានជ័យ ដែលបានខិតខំបំពេញតួនាទីភារកិច្ចរបស់ខ្លួនបានយ៉ាងល្អប្រសើរ ជាពិសេសការពារសន្តិសុខ សុវត្ថិភាព ក្នុងពេលបោះឆ្នោតជ្រើសតាំងតំណាងរាស្រ្តនីតិកាលទី៧ ប្រកបដោយទំនួលខុសត្រូវខ្ពស់។ ឯកឧត្តម បានណែនាំជម្រុញដល់គ្រប់អង្គភាពកងរាជអាវុធហត្ថ នូវកត្តាសំខាន់ៗ ៣ចំណុច ដែលអាវុធហត្ថត្រូវយកចិត្តទុកដាក់ រួមមាន៖ ១-ធនធានមនុស្ស អង្គភាពត្រូវមានធនធានមនុស្សប្រកបដោយសមត្ថភាព ដើម្បីបម្រើជាតិមាតុភូមិប្រកបដោយឆន្ទ:មនសិកា,២-គ្រឿងបជម្រក ដើម្បីរស់នៅ រៀនសូត្រ និងកន្លែងធ្វើការសមរម្យ និងទី៣-ការចិញ្ចឹមថែរក្សាសុខមាភាពអាវុធហត្ថក្រោមឱវាទ និងបន្តយកចិត្តទុក្ខដាក់លើជីវភាពរស់នៅរបស់យោធិនចូលនិវត្តន៍។

បន្ទាប់ពីចប់ពិធីសម្ពោធនាឱកាសនោះ ឯកឧត្តម សៅ សុខា ក៏បានអញ្ជើញសំណេះសំណាលជាមួយអតីតយោធិនចូលនិវត្តន៍ ពិការ និងគ្រួសារពលីមរណ:ចំនួន ៦៦នាក់ ដោយក្នុងម្នាក់ៗទទួលបានថវិកាចំនួន ២០ម៉ឺនរៀល៕