ប្រទេសជប៉ុន នឹងបញ្ជូនយន្តហោះចម្បាំងបំបាំងកាយ F-35 ជំនាន់ទី៥របស់ខ្លួនទៅក្រៅប្រទេសជាលើកដំបូងនៅចុងខែនេះ ដើម្បីចូលរួមក្នុងសមយុទ្ធនៅភាគខាងជើងប្រទេសអូស្ត្រាលី។

កងកម្លាំងស្វ័យការពារដែនអាកាសជប៉ុន ឬ JASDF បាននិយាយនៅក្នុងការចេញផ្សាយកាលពីថ្ងៃចន្ទថា យន្តហោះចម្បាំងរួមគ្នា Lockheed-Martin F-35A Lightning II ចំនួន៤គ្រឿងមកពីកងភាពទ័ពអាកាសទី៣ នៅទីក្រុងមីសាវ៉ា( Misawa) នឹងដាក់ពង្រាយរយៈពេលពីរសប្តាហ៍។

យោងតាមការចេញផ្សាយនោះ ការដាក់ពង្រាយនេះ នឹងឃើញយន្តហោះទាំងនោះចូលរួមក្នុងសមយុទ្ធហោះហើរតាមរយៈមូលដ្ឋានទ័ពអាកាស Andersen នៅលើទឹកដីសហរដ្ឋអាមេរិកគឺកោះGuam ទៅកាន់ទីក្រុង Darwin និងTindal ក្នុងដែនដីភាគខាងជើងនៃប្រទេសអូស្ត្រាលី។

នាវាដឹកប្រេង Boeing KC-767 មួយគ្រឿងរបស់JASDF យន្តហោះ Lockheed-Martin C-130 Hercules មួយគ្រឿង និងយន្តហោះ Kawasaki C-2 ពីរគ្រឿង នឹងគាំទ្រយន្តហោះ F-35 សម្រាប់សមយុទ្ធដែលចាប់ផ្តើម នៅថ្ងៃទី ២១ ខែសីហា និងបញ្ចប់ថ្ងៃទី២ ខែកញ្ញា។