លោក William Lai បាននិយាយអំឡុងពេលធ្វើដំណើរទៅកាន់ប្រទេសប៉ារ៉ាហ្គាយថា រាល់សកម្មភាពយោធារបស់ចិន ដើម្បីឆ្លើយតបទៅនឹងការចូលឈប់សំចត នៅសហរដ្ឋអាមេរិករបស់មេដឹកនាំលំដាប់ទី២ របស់កោះតៃវ៉ាន់រូបនេះ នឹងក្លាយជាការប៉ុនប៉ងរបស់ប្រទេសចិន ក្នុងការជ្រៀតជ្រែកលើការបោះឆ្នោតរបស់កោះនេះ។

មន្ត្រីកោះតៃវ៉ាន់ បាននិយាយថា ប្រទេសចិន អាចចាប់ផ្តើមសមយុទ្ធយោធា នៅសប្តាហ៍នេះ ដោយយកការឈប់ផ្ទេរជើងហោះហើររបស់លោក Lai នៅសហរដ្ឋអាមេរិកជាលេសដើម្បីបំភិតបំភ័យអ្នកបោះឆ្នោត មុនការបោះឆ្នោត នៅឆ្នាំក្រោយ និងធ្វើឲ្យអ្នកទាំងនោះ «ភ័យខ្លាចពីការផ្ទុះសង្គ្រាម»។

និយាយទៅកាន់អ្នកសារព័ត៌មាន កាលពីថ្ងៃអង្គារ (ទី១៥ ខែសីហា) នៅប្រទេសប៉ារ៉ាហ្គាយ ជាទីដែលលោកបានទៅដល់ដោយឆ្លងកាត់ទីក្រុងញូវយ៉ក លោក Lai បាននិយាយថា ការឈប់ប្ដូរជើងហោះហើររបស់លោក នៅសហរដ្ឋអាមេរិកបែបនេះ គឺជាទម្លាប់ធម្មតា ហើយប្រទេសចិន មិនមានហេតុផលណា ក្នុងការប្រើវាជាលេស ដើម្បី «បំភិតបំភ័យដោយពាក្យសំដី និងយោធាលើតៃវ៉ាន់» នោះទេ។

ទីភ្នាក់ងារសារព័ត៌មានបានដកស្រង់សម្តីរបស់លោក Lai ដែលនិយាយថា៖ «ប្រសិនបើប្រទេសចិនប្រើការឆ្លងកាត់នេះជាលេស ដើម្បីចាប់ផ្តើមសម្លុតកំហែង ដោយពាក្យសំដី និងយោធា ឬវិធីគំរាមកំហែងផ្សេងទៀត ទង្វើនេះត្រឹមតែមកជួយបញ្ជាក់អះអាងបន្ថែមលើសេចក្ដីរាយការណ៍របស់បណ្ដាញសារព័ត៌មានអន្តរជាតិដែលថា ប្រទេសចិនកំពុងព្យាយាមធ្វើអន្តរាគមន៍ ក្នុងការបោះឆ្នោតរបស់កោះតៃវ៉ាន់ជាមួយនឹងការគំរាមកំហែងផ្នែកយោធា»។

តែយ៉ាងណាក្ដី ក្រសួងការពារជាតិកោះតៃវ៉ាន់ បានឲ្យដឹងកាលពីថ្ងៃអង្គារថា ខ្លួនមិនទាន់ឃើញមានសមយុទ្ធទ្រង់ទ្រាយធំណាមួយរបស់ចិន នៅជិតកោះនេះនោះទេ៕