គណៈវិនិច្ឆ័យនៃរដ្ឋតិចសាស់ សហរដ្ឋអាមេរិក បានសម្រេចផ្តល់ប្រាក់សំណងដល់ស្រ្តីម្នាក់ ១,២ពាន់លានដុល្លារ បន្ទាប់ពីកាត់ក្ដីថា រូបនាងគឺជាជនរងគ្រោះនៃការបង្ហោះរឿងអាសអាភាស ដើម្បីជាការសងសឹក។

ស្ត្រីដែលត្រូវបានគេដាក់ឈ្មោះត្រឹមអក្សរកាត់ DL ក្នុងឯកសារតុលាការ បានដាក់ពាក្យបណ្តឹងពីបទត្រូវបានបៀតបៀន ប្រឆាំងនឹងអតីតមិត្តប្រុសរបស់នាង ក្នុងឆ្នាំ២០២២។ បណ្តឹងនោះបានចោទប្រកាន់ថា បុរសនោះ បានបង្ហោះរូបភាពស្និទ្ធស្នាលរបស់នាង នៅលើប្រព័ន្ធអ៊ិនធឺណិត ដើម្បីធ្វើឲ្យនាងរងនូវ «ភាពអាម៉ាស់ជាសាធារណៈ» បន្ទាប់ពីអ្នកទាំង២ បានចែកផ្លូវគ្នា។

មេធាវីរបស់ដើមចោទ ក្នុងរឿងក្តីនេះ បាននិយាយថា ដំណោះស្រាយនេះ គឺជាជ័យជម្នះសម្រាប់ជនរងគ្រោះនៃ«ការរំលោភបំពានផ្លូវភេទតាមរយៈរូបភាព»។ ដើមឡើយ មេធាវីរបស់នាង DL បានស្នើដល់គណៈវិនិច្ឆ័យទារសំណងជំងឺចិត្តចំនួន១០០លានដុល្លារ។

សូមបញ្ជាក់ថា ស្ត្រីរូបនេះ បានចែករំលែករូបថតស្និទ្ធស្នាលរបស់ខ្លួនជាមួយចុងចោទ អំឡុងពេលទំនាក់ទំនងជាមួយគ្នា។ បន្ទាប់ពីបែកគ្នា នៅឆ្នាំ២០២១ ជនល្មើសត្រូវបានចោទប្រកាន់ថា បានបង្ហោះរូបថតនៅលើវេទិកាបណ្ដាញសង្គម និងគេហទំព័រមនុស្សពេញវ័យ ដោយគ្មានការព្រមព្រៀងពីនាង៕