ភ្នំពេញ ៖ រដ្ឋាភិបាលកម្ពុជា តាមរយៈអគ្គនាយកដ្ឋានអន្តោប្រវេសន៍ បានបណ្តេញជនបរទេសចេញពីប្រទេសខ្លួនជាងមួយពាន់នាក់ ក្នុងរយៈពេល៦ខែដើមឆ្នាំ២០២៣នេះ បន្ទាប់ពីជនបរទេសទាំងនោះបានរស់នៅ និងធ្វើការនៅប្រទេសកម្ពុជាដោយខុសច្បាប់ និងគ្មានឯកសារបញ្ជាក់ត្រឹមត្រូវ។

ថ្លែងនៅក្នុងឱកាសអញ្ជើញចូលរួមក្នុងកម្មវិធីប្រកាសផ្ទេរភារកិច្ច និងតែងតាំងមុខតំណែង នាយនគរបាលថ្នាក់ឧត្តមសេនីយ៍ នៃអគ្គនាយកដ្ឋានអន្តោប្រវេសន៍នារសៀលថ្ងៃទី១៦ ខែសីហា ឆ្នាំ២០២៣នេះ ក្រោមអធិបតីភាព ឯកឧត្តម សុខ ផល រដ្ឋលេខាធិការក្រសួងមហាផ្ទៃ នាយឧត្តមសេនីយ៍ គៀត ចន្ទថារិទ្ធ អគ្គនាយករដ្ឋានអន្តោប្រវេសន៍ បានបញ្ជាក់ឲ្យដឹងថា មានជនបរទេសចំនួន១០៣៨នាក់មកពី ២៦ សញ្ជាតិ ដោយក្នុងនោះមានជនជាតិចិនច្រើនជាងគេគឺមានចំនួន៥៤៩នាក់ ជនជាតិឥណ្ឌូនេស៊ីចំនួន១៦៩នាក់ ជនជាតិវៀតណាមចំនួន១២៩នាក់ ថៃចំនួន២៦នាក់ ម៉ាឡេស៊ី២៥នាក់ និងជនជាតិបរទេស ផ្សេងៗទៀត ត្រូវបានបណ្តេញចេញជាបន្តបន្ទាប់ ក្រោយរកឃើញថាពួកគេបានរស់នៅ និងធ្វើការនៅកម្ពុ ជាដោយខុសច្បាប់ និងខ្លះទៀតបានប្រព្រឹត្តល្មើសច្បាប់ជាដើម។

ជាមួយគ្នានោះដែរ នាយឧត្តមសេនីយ៍ គៀត ចន្ទថារិទ្ធ ក៏បានបញ្ជាក់ឲ្យដឹងផងដែរថា ក្នុងរយៈពេលមួយឆមាស ឆ្នាំ២០២៣នេះ អគ្គនាយកដ្ឋានអន្តោប្រវេសន៍ក៏បានពិនិត្យ និងបន្តការអនុញ្ញាតិ ឲ្យជនបរទេសចំនួនជិតបីសែននាក់រស់នៅកម្ពុជាបន្តទៀត ខណៈការផ្តល់ទិដ្ឋាកាចេញជាងពីរពាន់នាក់ និងផ្តល់ជូនជនបរទេសមិនមែនជាអន្តោប្រវេសន៍ស្នាក់នៅបណ្តោះអាសន្ន រយៈពេលយូរជាងពីរសែនប្រាំបីម៉ឺន នាក់ផងដែរ។

នាយឧត្តមសេនីយ៍គៀត ចន្ទថារិទ្ធក៏បានឲ្យដឹងផងដែរថា ក្នុងរយៈពេល៦ខែឆ្នាំ២០២៣នេះក៏ មានជនបរទេសជិត២៦ម៉ឺននាក់បានមកសុំប័ណ្ណធ្វើការងារនៅប្រទេសកម្ពុជាផងដែរ ខណៈការស្នើសុំនេះគឺមានការសហការគ្នាជាមួយក្រសួងការងារបណ្តុះបណ្តាលវិជ្ជាជីវៈ។

ថ្លែងនៅក្នុងពិធីប្រកាសផ្ទេរភារកិច្ច និងតែងតាំងមុខតំណែង នាយនគរបាលថ្នាក់ឧត្តមសេនីយ៍ នៃអគ្គនាយកដ្ឋានអន្តោប្រវេសន៍ ឯកឧត្តម សុខ ផល ក៏បានជំរុញឲ្យនគរបាលអន្តោប្រវេសន៍ខិតខំកិច្ចការ ងាររបស់ខ្លួនឲ្យសកម្មបន្ថែមទៀត ក្នុងកិច្ចការត្រួតពិនិត្យជនអន្តោប្រវេសន៍ខុសច្បាប់ ដើម្បីសន្តិសុខជាតិ ខណៈកិច្ចការងារដែលនគរបាលអន្តោប្រវេសន៍បានធ្វើនាពេលកន្លងមក បានល្អប្រសើរក៏ពិតមែន ប៉ុន្តែវាក៏នៅមានភាពចន្លោះប្រហោងដែលត្រូវតែបំពេញ និងត្រូវទប់ស្កាត់ឲ្យបានផងដែរ៕ អត្ថបទ ៖ បាន ចក់