ព្រះសីហនុ ៖ កាលពីថ្ងៃទី២៣ ខែឧសភា ម្សិលមិញនេះ កម្លាំងកងរាជអាវុធហត្ថស្រុកព្រៃនប់ បានឃាត់ខ្លួនកម្មកររោងចក្រ ៥នាក់ បម្រើការងារនៅរោងចក្រ ហ្សីជាងហុមភ័ញ ហ្វើនីឈ័រ ឯ.ក នៃតំបន់សេដ្ឋកិច្ចពិសេស ក្នុងស្រុកព្រៃនប់ ខេត្តព្រះសីហនុ ដែលមានការពាក់ព័ន្ធដោយផ្ទាល់ជាមួយអ្នកជំងឺកូវីដ-១៩ ហើយគេចវេះមិនសហការជាមួយមន្ត្រីសុខាភិបាល ដើម្បីយកសំណាកទៅធ្វើវិភាគ។
លោក សរ កក្កដា អភិបាលស្រុកព្រៃនប់ បានឱ្យដឹងថា បន្ទាប់ពីធ្វើការសាកសួរ អប់រំណែនាំ និងពិន័យអន្តរការណ៍រួចមក កម្លាំងកងរាជអាវុធហត្ថ បានបញ្ជូនបុគ្គលទាំង០៥រូបនេះ ទៅផ្តល់វត្ថុសំណាក ដើម្បីធ្វើតេស្តវិភាគរកមេរោគកូវីដ-១៩។
យោងតាមអនុក្រឹត្យលេខ ៣៧ អនក្រ.បក ចុះថ្ងៃទី១២ ខែមីនា ឆ្នាំ២០២១ ត្រង់មាត្រា២១ បាន ចែងថា បុគ្គល (ដែលមានកាតព្វកិច្ចត្រូវផ្ដល់វត្ថុសំណាក) ដែលមិនសហការជាមួយមន្ត្រីសុខាភិបាល ដើម្បីយកវត្ថុសំណាកទៅវិភាគរកមេរោគកូវីដ-១៩ ត្រូវផ្ដន្ទាទោសជាពិន័យអន្តរការណ៍ ពី១លានរៀល ទៅ ៥លានរៀល។
អាជ្ញាធរ បានធ្វើការ អំពាវនាវដល់ប្រជាពលរដ្ឋ ដែលមានការប្រាស្រ័យទាក់ទងដោយផ្ទាល់ជាមួយអ្នកជំងឺកូវីដ-១៩ ត្រូវរាយការណ៍មកអាជ្ញាធរមូលដ្ឋានជាបន្ទាន់ ដើម្បីផ្តល់វត្ថុសំណាកឲ្យទាន់ពេលវេលា ដើម្បីកុំឱ្យរងនូវទោសទណ្ឌ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
