ភ្នំពេញ ​​​​​​​​​​​​៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លើកឡើងថា បច្ចុប្បន្នកម្ពុជាមានសន្តិសុខស្បៀងគ្រប់គ្រាន់ និងកំពុងបន្តជំរុញអំពីសុវត្ថិភាពនិងគុណភាពតាមកម្រិតស្តង់ដាសុវត្ថិភាពនិងអនាម័យ ឱ្យមានការទទួលស្គាល់លើឆាកអន្តរជាតិសម្រាប់ការនាំចេញ ក្នុងនោះក៏ទាមទារឱ្យស្ថាប័នពាក់ព័ន្ធ ត្រូវចូលរួម និងសហការគ្នាឱ្យបានល្អប្រសើរផងដែរ។

នៅក្នុងទិវាសុវត្ថិភាពម្ហូបអាហារពិភពលោកនៅកម្ពុជា កាលពីថ្ងៃទី១៦ ខែសីហាកន្លងទៅ ឯកឧត្តម ឌិត ទីណា បានមានប្រសាសន៍ថា សុវត្ថិភាពម្ហូបអាហារ ពិតជាចាំបាច់ដែលផ្សារភ្ជាប់នឹងសុខភាពរបស់ប្រជាជនទាំងមូល ដូច្នេះត្រូវយកចិត្តទុកដាក់ក្នុងខ្សែច្រវាក់អាហារនេះ តាំងពីអ្នកផលិតរហូតអ្នកបរិភោគ។

ឯកឧត្តមរដ្ឋមន្ដ្រី បានគូសបញ្ជាក់ថា ជំងឺបណ្តាលមកពីម្ហូបអាហារ នៅតែជាបញ្ហាប្រឈមសុខភាពសាធារណៈធ្ងន់ធ្ងរនៅកម្ពុជានៅឡើយ។ ឯកឧត្តមរៀបរាប់ថា នៅចន្លោះឆ្នាំ២០១០-២០១៥ ជាងពាក់កណ្តាលនៃការផ្ទុះឡើងនៃជំងឺដែលបានរាយការណ៍មក គឺបណ្ដាលមកពីការពុលអាហារ ឬរោគរាគរូស។ លើសពីនេះទៅទៀត នៅចន្លោះឆ្នាំ២០១៤-២០១៩ ការផ្ទុះជំងឺឆ្លងបង្កដោយម្ហូបអាហារចំនួន ១៣៤ករណី ត្រូវបានរកឃើញថា កើតឡើងដោយសារកង្វះការប្រតិបត្តិអនាម័យខ្ជាប់ខ្ជួន ជាពិសេសអំឡុងពេលរៀបចំទុកដាក់អាហារការគ្រប់គ្រងកម្រិតសីតុណ្ហភាពម្ហូបអាហារមិនបានត្រឹមត្រូវការឆ្លងរាលដាលពីមួយទៅមួយ និងការប្រើប្រាស់គ្រឿងផ្សំម្ហូបអាហារ និងប្រភពទឹកមិនស្អាត។ 

សូមបញ្ជាក់ថា ទិវាសុវត្ថិភាពម្ហូបអាហារពិភពលោកនៅកម្ពុជា ឆ្នាំ២០២៣នេះ រៀបចំឡើងក្រោមប្រធានបទ "ស្តង់ដាម្ហូបអាហារ ជួយសង្គ្រោះជីវិត" ក្នុងគោលបំណងផ្សព្វផ្សាយអប់រំ និងលើកកម្ពស់ការយល់ដឹងជាសាធារណៈអំពីសារៈសំខាន់នៃវិស័យសន្តិសុខស្បៀង និងអាហារូបត្ថម្ភ ក្នុងការចូលរួមអភិវឌ្ឍន៍មូលធនមនុស្ស ជំរុញកំណើនសេដ្ឋកិច្ច និងវឌ្ឍនភាពសង្គម៕ ​​​​​​​​​​​​​​​​​​​​ ដោយ ៖ បូរ៉ាវី