​បាល់ទាត់៖ ​ក្រុម Lille បាន​គ្រង​ជើងឯក​ក្របខណ្ឌ​លី​គ​កំពូល​បារាំង​ជា​លើក​ទី ៤ ក្រោយ​បញ្ចប់​រដូវ​កាល​ដោយមាន ១ពិន្ទុ​ពីលើ​ក្រុម​ការពារ​ជើងឯក Paris Saint Germain​។ ​​គ្រាប់​បាល់​របស់ Jonathan David និង Burak Yilmaz បានធ្វើអោយ Lille ទទួលបាន ៣​ពិន្ទុ​ដ៏​មាន​សារសំខាន់​ក្នុង​សប្តាហ៍​ចុងក្រោយ​នេះ ​បើ​ទោះ​ក្រុម​ម្ចាស់ផ្ទះ Angers តប​បាន ១​គ្រាប់​មុន​ចប់​ការប្រកួត​ដោយ Angelo Fulgini​។

​​នេះ​ជា​ពាន​ជើងឯក​លី​គ​កំពូល​បារាំង Ligue 1 លើកដំបូង​សំរាប់ Lille រាប់​ពី​ឈ្នះ​ចុងក្រោយ​នៅ​ឆ្នាំ២០១១ ដែល​នៅពេលនោះ​មាន Eden Hazard និង Gervinho ជួយ Lille លើក​ពាន​លើកដំបូង​ក្នុង​រយៈពេល ៥៧ឆ្នាំ​។ ​​រដូវ​កាល​នេះ Lille ត្រូវ​ពឹងផ្អែក​លើក​កំលាំង​ប្រយុទ្ធ​ទាំងពីរ​គឺ​ខ្សែប្រយុទ្ធ​កាណាដា Jonathan David និងខ្សែប្រយុទ្ធ​វ័យ ៣៥ឆ្នាំ​ទួ​ក​គី Burak Yilmaz​។ ​​ចំណែក PSG បាន​យកឈ្នះ​ការប្រកួត​ចុងក្រោយ​លើ Brest ២-០ ផងដែរ​ និង​សង្ឃឹមថា Lille ចាញ់​ដើម្បី​គ្រង​ជើងឯក​។ ​​យ៉ាងណាក្តី​ក្រុម​របស់លោក Mauricio Pochettino មិនអាច​ការពារ​ជើងឯក​បាន និង​របូត​ពាន Ligue 1 នេះ​ជា​លើកដំបូង​តាំងពី​រដូវ​កាល ២០១៦-២០១៧ ដែល Monaco ជា​ជើងឯក​។

​​លី​គ​កំពូល​បារាំង​បាន​បិទ​បញ្ចប់​រដូវ​កាល​ដោយ​បី​ក្រុម Lille, PSG និង Monaco ទទួលបាន​កៅអី​នៅ UEFA Champions League រដូវ​កាល​ក្រោយ​ឯ Lyon លេខ ៤ បាន​កៅអី Europa League ស្របពេល Marseille និង Rennes បាន​កៅអី Conference League​។ ​​៣​ក្រុម​ដែល​កាត់ចោល​រួមមាន Nantes, Nimes និង Dijon ឯ​បី​ក្រុម​ដែល​ឡើងមក​វិញ​មាន Troyes និង Clement Foot ឯ​បី​ក្រុម​ទៀត​រួមមាន Toulouse, Grenoble និង Paris FC ត្រូវ​លេង Play-Off៕

​អត្ថបទ​៖​នាង សុភា​វុ​ធ