អ៊ុយក្រែន ៖ កងកម្លាំងអ៊ុយក្រែន នៅថ្ងៃព្រហស្បតិ៍ (ទី១៧ ខែសីហា) នេះ បានអះអាងពីការទទួលបានជោគជ័យ នៅសមរភូមិភាគអាគ្នេយ៍ ជាទីដែលពួកគេបានរំដោះតំបន់តាំងលំនៅឋានមួយកន្លែង នៅថ្ងៃមុននោះ។

អ៊ុយក្រែនបានប្រកាសពីការដណ្តើមបានភូមិ Urozhaine មកវិញពីកងទ័ពរុស្ស៊ី នៅភាគអាគ្នេយ៍ កាលពីថ្ងៃពុធ (ទី១៦ ខែសីហា) ហើយភូមិ Urozhaine ដែលស្ថិតនៅជ្រុងនៃតំបន់ Donetsk គឺជាភូមិដំបូងដែលទីក្រុងគីវ និយាយថា ខ្លួនដណ្តើមបានវិញ គិតតាំងពីថ្ងៃទី២៧ ខែកក្កដា ជាសញ្ញានៃការប្រឈម ដែលអ៊ុយក្រែនជួបប្រទះ ពេលវាយរុលទៅមុខ ដោយឆ្លងកាត់ខ្សែត្រៀមរបស់រុស្ស៊ីដែលបង្កប់ដោយមីនយ៉ាងច្រើន ជាមួយនឹងការគ្មានជំនួយពីផ្លូវអាកាសដ៏មានឥទ្ធិពល។

អ្នកនាំពាក្យយោធាអ៊ុយក្រែនលោក Andriy Kovaliov បានប្រាប់ទូរទស្សន៍ជាតិថា នៅក្នុងទិសដៅភាគខាងត្បូងនៃភូមិ Urozhaine កងទ័ពអ៊ុយក្រែន បានទទួលជោគជ័យ។ តែយ៉ាងណា លោកមិនបានផ្តល់ព័ត៌មានលម្អិតបន្ថែមនោះទេ។

ជាមួយគ្នានេះ ទីក្រុងគីវ ឲ្យដឹងថា ការវាយលុករបស់ខ្លួន កំពុងដំណើរការទៅយឺតជាងអ្វីដែលខ្លួនចង់បាន ដោយសារតែតំបន់បង្កប់មីនដ៏ធំ និងការរៀបចំខ្សែត្រៀមការពាររបស់រុស្ស៊ី។ 

សូមបញ្ជាក់ថា រុស្ស៊ីគ្រប់គ្រងជិតមួយភាគប្រាំនៃទឹកដីរបស់អ៊ុយក្រែន ដែលក្នុងនោះរួមទាំងឧបទ្វីបគ្រីមៀ និងភាគច្រើននៃតំបន់ Luhansk ព្រមទាំងផ្នែកធំៗនៃតំបន់ Donetsk, Zaporizhzhia និង Kherson៕