អេក្វាឌ័រ ៖ អេក្វាឌ័រ ត្រូវបានចាត់ទុកថា ជាប្រទេសស្ងប់ស្ងាត់បំផុតមួយ នៅអាមេរិកឡាទីន ឬអាមេរិកខាងត្បូង រហូតដល់ប្រហែល ៣ឆ្នាំមុន ជាពេលវេលានៃអំពើហិង្សា និងឧក្រិដ្ឋកម្មទាំងឡាយ ដែលមានឬសគល់ពីកូកាអ៊ីន បានចាប់ផ្តើមលុកលុយពន្ធនាគារ តាមដងផ្លូវ ហើយឥឡូវនេះ កើតលើអ្នកនយោបាយដ៏មានសក្តានុពល។

បេក្ខជនដែលជាក្តីសង្ឃឹមក្នុងការក្លាយជាប្រធានាធិបតីអេក្វាឌ័រ លោក Fernando Villavicencio ត្រូវបានធ្វើឃាត នៅដើមខែនេះ ពេលលោកកំពុងធ្វើយុទ្ធនាការរកសំឡេងឆ្នោត។ ក្រោមការការពាររបស់នគរបាល និងអង្គរក្ស លោក Villavicencio បាននិយាយមុនពេលរូបលោក ត្រូវបានគេសម្លាប់ថា ក្រុមជួញដូរគ្រឿងញៀន បានសូកប៉ាន់ចៅក្រម និងអ្នកនយោបាយជាន់ខ្ពស់។

ក្រុមជួញដូរគ្រឿងញៀនកូឡុំប៊ី និងម៉ិកស៊ិក បានតាំងទីលំនៅ ក្នុងទីក្រុងឆ្នេរសមុទ្រ ដូចជាមជ្ឈមណ្ឌលសេដ្ឋកិច្ច Guayaquil ដោយដឹកជញ្ជូនសារធាតុកូកាអ៊ីន ក្នុងតម្លៃរាប់រយលានដុល្លារ។ ការស្លាប់ដោយហិង្សា នៅអេក្វាឌ័រ បានកើនឡើងយ៉ាងខ្លាំង ក្នុង ៦ខែដំបូងនៃឆ្នាំ២០២២ រហូតដល់រយៈពេលដូចគ្នា ក្នុងឆ្នាំ២០២៣។

ជាមួយគ្នានេះ ប្រទេសអេក្វាឌ័រ ត្រូវបានគេចាត់ទុកថា ជា «ទីតាំងចុងក្រោយ» សម្រាប់ការនាំចេញកូកាអ៊ីនខុសច្បាប់ចេញពីតំបន់អាមេរិកខាងត្បូងឆ្ពោះទៅកាន់សហរដ្ឋអាមេរិក ឬអឺរ៉ុប។

រដ្ឋាភិបាលអេក្វាឌ័រ កំពុងប្រឹងទប់ទល់ជាមួយនឹងការធ្លាក់ចុះសេដ្ឋកិច្ច មូលនិធិទាប ជម្លោះនយោបាយ ការអះអាងពីអំពើពុករលួយ និងគម្លាតការផ្ដល់ហិរញ្ញវត្ថុ សម្រាប់ការអនុវត្តច្បាប់ និងកម្មវិធីសង្គម។

ករណីប្លន់ ឥឡូវនេះ ក៏កំពុងក្លាយជារឿងធម្មតា ក្នុងប្រទេសអេក្វាឌ័រដែរ។ ទិន្នន័យពីអគ្គស្នងការនគរបាលជាតិបង្ហាញថា ការប្លន់ចំនួន ៣១.៤៨៥ករណី ត្រូវបានរាយការណ៍ កាលពីឆ្នាំមុន ពោលគឺច្រើនជាង ១១.០០០ករណី ក្នុងឆ្នាំ២០២០។ យុវជនអេក្វាឌ័រជាច្រើននាក់ បានធ្វើនិរប្រវេសន៍ទៅភាគខាងជើង ដោយសង្ឃឹមថា នឹងទៅដល់សហរដ្ឋអាមេរិក៕