កូរ៉េខាងត្បូង ៖ ក្រសួងការបរទេសកូរ៉េខាងត្បូងនៅថ្ងៃព្រហស្បតិ៍នេះ បានស្វាគមន៍ការដាក់ទណ្ឌកម្មដែលប្រកាសដោយសហរដ្ឋអាមេរិកក្នុងសប្តាហ៍នេះ ប្រឆាំងនឹងអង្គភាពចំនួនបីដែលពាក់ព័ន្ធនឹងកិច្ចព្រមព្រៀងអាវុធខុសច្បាប់រវាងប្រទេសកូរ៉េខាងជើង និងរុស្ស៊ី។

ការិយាល័យគ្រប់គ្រងទ្រព្យសម្បត្តិបរទេស (OFAC) របស់ក្រសួងរតនាគារសហរដ្ឋអាមេរិក កាលពីថ្ងៃពុធ បានដាក់ទណ្ឌកម្មលើក្រុមហ៊ុន Verus LLC, Defence Engineering LLP និង Versor SRO ដែលទាំងអស់នេះ ជាកម្មសិទ្ធិឬដឹកនាំដោយជនជាតិស្លូវ៉ាគី លោក Ashot Mkrtychev ។

ការដាក់ទណ្ឌកម្មនេះ បានកើតឡើងចំពេលដែលមានការរំពឹងទុកកាន់តែខ្លាំងឡើងថា ប្រទេសទាំងពីរអាចនឹងកំពុងស្វែងរកការជំរុញការជួញដូរអាវុធខុសច្បាប់របស់ពួកគេ។ លោក Mkrtychev ត្រូវបានដាក់ក្នុងបញ្ជីខ្មៅដោយ OFAC កាលពីថ្ងៃទី ៣០ខែមីនា សម្រាប់ការព្យាយាមសម្របសម្រួលកិច្ចព្រមព្រៀងអាវុធរវាងរុស្ស៊ី និងកូរ៉េខាងជើង។

លោកLim Soo-suk អ្នកនាំពាក្យក្រសួងការបរទេសកូរ៉េខាងត្បូង បានថ្លែងប្រាប់សន្និសីទសារព័ត៌មានជាប្រចាំថា៖ «រដ្ឋាភិបាលរបស់យើងស្វាគមន៍ចំពោះចំណាត់ការថ្មីៗនេះរបស់សហរដ្ឋអាមេរិក»។