ភ្នំពេញ ៖ មន្ទីរពេទ្យមិត្តភាពខ្មែរ-សូវៀត នៃក្រសួងសុខាភិបាល ព្រឹកថ្ងៃទី១៧ ខែសីហា ឆ្នាំ២០២៣នេះ បានសម្ពោធដាក់ឲ្យដំណើរការម៉ាស៊ីន MRI(អ៊ឹមរ៉ាយ) ផ្នែករូបភាពវេជ្ជសាស្រ្ត សម្រាប់បម្រើដល់ការធ្វើរោគវិនិច្ឆ័យដល់អ្នកជំងឺ និងក៏ជាផ្នែកមួយដើម្បីពង្រឹង និងបង្កើននូវគុណភាព នៃការព្យាបាលជំងឺជូនប្រជាពលរដ្ឋកាន់តែមានប្រសិទ្ធភាព។

​ឯកឧត្តមសាស្រ្តាចារ្យ ងី ម៉េង នាយកមនី្ទរពេទ្យមិត្តភាពខ្មែរ-សូវៀត បានលើកឡើងថា មនី្ទរពេទ្យបានសម្ពោធដាក់ឲ្យដំណើរការម៉ាស៊ីន MRIនាថ្ងៃនេះ គឺប្រើប្រាស់ដើម្បីថត ឬផលិតរូបភាពស្ទើតែពេញសរីរាង្គរបស់មនុស្ស និងធ្វើរោគវិនិច្ឆ័យជំងឺជាច្រើន ទាក់ទងនឹងផ្លូវទឹកប្រមាត់ ខួរក្បាល ឆ្អឹងខ្នង ថ្លើម លំពែង ស្បូន តម្រង់នោម និងការកៀបសសៃឆ្អឹងខ្នងដោយការលានទ្រនាប់ឆ្អឹង និងគ្រោះថ្នាក់មួយចំនួនទៀត។ ម៉ាស៊ីន MRI ជាការអភិវឌ្ឍរវាងវិស័យឯកជន និងរដ្ឋ ដើម្បីផ្តល់សេវាជូនប្រជាពលរដ្ឋ ដែលតម្លៃរបស់ម៉ាស៊ីន ៥០ម៉ឺនដុល្លារសហរដ្ឋអាមេរិក។ នៅពេលខាងមុខនេះ មនី្ទរពេទ្យ និងដាក់ដំណើរការម៉ាស៊ីនថ្មីមួយបន្ថែមទៀត នៅផ្នែកមហារីក ដែលជាប្រភេទម៉ាស៊ីនម៉ាយក្រូវេ ដែលអាចដុតកម្ទេចនូវកោសិកាមហារីក ដែលរហូតមកដល់ពេលនេះ មនី្ទរពេទ្យបានរៀបចំបំពាក់ស្ទើររួចរាល់ទាំងស្រុងហើយ និងដោយមានការគាំទ្រពីឯកឧត្តមសាស្រ្តាចារ្យ ស៊ា ហួង។ ឯកឧត្តមសាស្រ្តាចារ្យ ងី ម៉េង សង្ឃឹមថាយើងនិងកាន់តែមានសមត្ថភាពខ្ពស់ ក្នុងការផ្តល់សេវាជូនដល់ប្រជាពលរដ្ឋដោយមិនចាំបាច់ធ្វើដំណើរទៅក្រៅប្រទេសនោះទេ គឺក្នុងមនី្ទរពេទ្យមិត្តភាពខ្មែរ-សូវៀត ផ្តល់សេវាថែទាំសុខភាពជូនប្រជាពលរដ្ឋសឹងតែគ្រប់ផ្នែកទាំងអស់។

នាឱកាសនោះដែរ ឯកឧត្តមសាស្រ្តាចារ្យ ស៊ា ហួង រដ្ឋលេខាធិការក្រសួងសុខាភិបាល និងជាប្រធានក្រុមប្រឹក្សាភិបាល នៃមនី្ទរពេទ្យមិត្តភាពខ្មែរ-សូវៀត សូមចូលរួមអបអរសាទរជាមួយថ្នាក់ដឹកនាំមនី្ទរពេទ្យទាំងអស់ នេះជាមោទនភាពថ្មីមួយបន្ថែមទៀត ដែលមនី្ទរពេទ្យមិត្តភាពខ្មែរ-សូវៀត បានបំពាក់ម៉ាស៊ីនថ្មីទំនើបក្នុងផ្នែករូបភាពវេជ្ជសាស្រ្ត គឺម៉ាស៊ីន MRI ដែលមានសារសំខាន់មែនទែនក្នុងការផ្តល់ព័ត៌មានឲ្យបានស៊ីជម្រៅ និងធ្វើរោគវិនិច្ឆ័យដល់អ្នកជំងឺ ហើយយើងនៅតែបន្តពង្រីកការធ្វើរោគវិនិច្ឆ័យ ក៏ដូចជាការព្យាបាលជំងឺផ្សេងៗ ដល់ប្រជាពលរដ្ឋឲ្យមានគុណភាព។

ជាចុងក្រោយឯកឧត្តមសាស្រ្តាចារ្យ ស៊ា ហួង បានរំលឹកដល់បងប្អូនក្មួយៗ ដែលជាលោកគ្រូពេទ្យ អ្នកគ្រូពេទ្យគ្រប់រូប ត្រូវតែមានគុណធម៌ និងវិជ្ជាជីវៈជាពេទ្យ បើទោះបីជាយើងមានសម្ភារៈបរិក្ខារវេជ្ជសាស្រ្តល្អទំនើបយ៉ាងណាក៏ដោយ បើសិនជាយើងគ្មានគុណធម៌ និងវិជ្ជាជីវៈពេទ្យនោះទេ គឺយើងមិនបានទទួលនូវលទ្ធផលល្អ ក្នុងការផ្តល់សេវាសុខាភិបាលជូនប្រជាជន។ ដូច្នេះកុំភ្លេចឲ្យសោះគុណធម៌ និងវិជ្ជាជីវៈពេទ្យ គឺជាកត្តាមួយដែលមិនអាចខ្វះបាននោះទេ គឺបង្រ្គប់ទៅជាមួយនឹងសម្ភារៈបរិក្ខារវេជ្ជសាស្រ្តមធ្យោបាយ និងការពង្រឹងសមត្ថភាពគ្រូពេទ្យទាំងអស់ ដើម្បីផ្តល់សេវាជូនប្រជាពលរដ្ឋឲ្យបានគ្រប់ជ្រុងជ្រោយ៕ អត្ថបទ ៖ រដ្ឋា