ប្រធានាធិបតីឥណ្ឌូនេស៊ីលោក Joko Widodo កាលពីថ្ងៃពុធ (ទី១៦ ខែសីហា) បានធ្វើសេចក្ដីស្នើថវិកាចំនួន ៣.៣០៤,១សែនកោដិរូពីយ៉ា (២១៦,២៤ពាន់លានដុល្លារ) ទៅកាន់សភា សម្រាប់ឆ្នាំ២០២៤ ដែលជាឆ្នាំចុងក្រោយនៃការកាន់តំណែងរបស់លោក ដោយលោកសន្យាថា នឹងការពារសេដ្ឋកិច្ចទប់ទល់នឹងបញ្ហាប្រឈមសកល និងរក្សាស្ថិរភាពតម្លៃចំណីអាហារ។

សំណើថវិកា គឺមានចំនួនប្រហែល ៦ភាគរយធំជាងផែនការចំណាយ ក្នុងឆ្នាំនេះ ដែលត្រូវបានកែសម្រួលរហូតដល់៣.១២៣,៧សែនកោដិរូពីយ៉ា។ លើសពីនេះ ការស្នើនោះ ក៏ប៉ាន់ស្មានដែរថា នឹងមានកំណើនសេដ្ឋកិច្ច ៥,២ភាគរយ នៅឆ្នាំក្រោយ ពោលគឺទាបជាងគោលដៅឆ្នាំ២០២៣ ដែលមានកំណើន ៥,៣ភាគរយ។

ក្នុងសុន្ទរកថាប្រចាំឆ្នាំរបស់លោកទៅកាន់សភា ពោលគឺ ១ថ្ងៃនៅមុនបុណ្យឯករាជជាតិរបស់ប្រទេសឥណ្ឌូនេស៊ី លោកប្រធានាធិបតី ដែលគេស្គាល់ទូទៅថា លោក Jokowi បានថ្លែងថា៖ «គម្រោងថវិការដ្ឋឆ្នាំ២០២៤ ត្រូវតែអាចឆ្លើយតបទៅនឹងសន្ទុះដ៏រឹងមាំនៃសេដ្ឋកិច្ច ដោះស្រាយបញ្ហាប្រឈម និងគាំទ្រយ៉ាងល្អប្រសើរនូវរបៀបវារៈនៃការអភិវឌ្ឍ និងសុខុមាលភាព»។

លោកមិនបានផ្តល់នូវគោលនយោបាយសារពើពន្ធជាក់លាក់ សម្រាប់ឆ្នាំ២០២៤ ទេ ប៉ុន្តែលោកបានគូសបញ្ជាក់ពីសារៈសំខាន់នៃសន្តិសុខស្បៀង និងថាមពល និងការកសាងឧស្សាហកម្មការពារជាតិ ដែលមានការប្រកួតប្រជែង ចំពេលមានការរំខានដល់ខ្សែចង្វាក់ផ្គត់ផ្គង់សកល ដោយសារតែការប្រេះឆាភូមិសាស្ត្រនយោបាយ៕