អ្នកសម្របសម្រួលក្រុមប្រឹក្សាសន្តិសុខជាតិសហរដ្ឋអាមេរិកសម្រាប់ទំនាក់ទំនងជាយុទ្ធសាស្ត្រលោក ចន ឃើប៊ី(John Kirby) បានថ្លែងប្រាប់ទីភ្នាក់ងារសារព័ត៌មានក្យូដូ (Kyodo )ថា ប្រធានាធិបតីអាមេរិក លោក ចូ បៃដិន (Joe Biden) បានត្រៀមខ្លួនរួចជាស្រេច ដើម្បីពិភាក្សាអំពីការរំសាយអាវុធនុយក្លេអ៊ែរនៅឧបទ្វីបកូរ៉េជាមួយមេដឹកនាំកូរ៉េខាងជើងលោក គីម ជុងអ៊ុន (Kim Jong-un) ដោយពុំមានបុរេលក្ខខណ្ឌ។

មន្ត្រីអាមេរិករូបនេះ ត្រូវបានគេដកស្រង់សម្តីកាលពីថ្ងៃសុក្រថា៖«យើងសុខចិត្តអង្គុយចរចា ដោយគ្មានបុរេលក្ខខណ្ឌ»។

តាមសម្ដីរបស់លោក ប្រទេសកូរ៉េខាងជើង នៅមិនទាន់ឆ្លើយតបជាវិជ្ជមានចំពោះសំណើនោះទេ។

យោងតាមសារព័ត៌មានក្យូដូ វាគឺជាលើកទីមួយហើយ ដែលរដ្ឋបាលលោកបៃដិន បានប្រកាសជាចំហ ដើម្បីត្រៀមខ្លួនសម្រាប់កិច្ចចរចាថ្នាក់កំពូលជាមួយកូរ៉េខាងជើង។ កាលមុននោះ ទីក្រុងវ៉ាស៊ីនតោន បានចរចាជាមួយលោកគីម ជុងអ៊ុន ក្នុងអំឡុងពេលលោកប្រធានាធិបតីដូណាល់ ត្រាំ កាន់នៅតំណែង។

យោងតាមក្រុមមន្ត្រីជាន់ខ្ពស់ដែលចូលរួមក្នុងការត្រៀមរៀបចំសម្រាប់កិច្ចប្រជុំកំពូលត្រីភាគីនាពេលខាងមុខរបស់សហរដ្ឋអាមេរិក ជប៉ុន និងកូរ៉េខាងត្បូង ក្រុមមេដឹកនាំទាំងនេះ នឹងយល់ព្រមបង្កើនគោលនយោបាយរបស់ពួកគេក្នុងការរារាំងកម្លាំងយោធារបស់កូរ៉េខាងជើង និងចិនដែលកំពុងកើនឡើង។