ក្រុមតន្រ្តីរ៉ុករបស់អាមេរិកឈ្មោះ «The Killers» បានសូមអភ័យទោសចំពោះការនាំអ្នកវាយស្គរជនជាតិរុស្ស៊ីម្នាក់ឡើងឆាក អំឡុងពេលសម្ដែង ក្នុងប្រទេសហ្ស៊កហ្ស៊ី និងចំពោះការពិពណ៌នាប្រាប់អ្នកគាំទ្រថា ជា «បងប្អូនប្រុសស្រី» ដែលទង្វើនេះ បានបណ្តាលឲ្យមានការហ៊ោចំអកពីទស្សនិកជន។

ប្រទេសហ្ស៊កហ្ស៊ីមានប្រវត្តិសាស្ត្រតានតឹងយ៉ាងយូរអង្វែង ជាមួយប្រទេសជិតខាងភាគខាងជើងរបស់ខ្លួនដែលមានសភាពកាន់តែធ្ងន់ធ្ងរឡើង ដោយការលុកលុយរបស់ទីក្រុងម៉ូស្គូលើអ៊ុយក្រែន ក្នុងខែកុម្ភៈ ឆ្នាំ២០២២ និងលំហូរជនអន្តោប្រវេសន៍រុស្ស៊ីដ៏ច្រើនសន្ធឹកសន្ធាប់ជាបន្តបន្ទាប់ ដែលភៀសខ្លួនចេញពីប្រទេសរបស់ពួកគេ។

ក្រុមតន្រ្តី ដែលទទួលបានពានរង្វាន់ជយលាភី Grammy Awards (ហ្គ្រមីអឹវ៉តស៍) ដល់ទៅ ៧ដងរបស់ឧស្សាកហម្មតន្ត្រី បានធ្វើការសម្តែង កាលពីថ្ងៃអង្គារ (ទី១៥ ខែសីហា) នៅរមណីយដ្ឋានសមុទ្រខ្មៅ Batumi អំឡុងដំណើរទេសចរណ៍ នៅតំបន់អឺរ៉ុបរបស់ខ្លួន។

អមដោយការប្រាប់ថា នេះគឺទម្លាប់ ដែលមានជាយូរមកហើយ ក្នុងការអញ្ជើញនរណាម្នាក់ឲ្យឡើងមកវាយស្គរនោះ វង់តន្ត្រីនេះ បានរៀបរាប់ក្នុងសេចក្តីថ្លែងការណ៍ តាមរយៈទំព័រ Facebook របស់ខ្លួនថា៖ «ប្រជាជនហ្ស៊កហ្ស៊ីដ៏ល្អទាំងអស់គ្នា ទង្វើនេះ មិនមានគោលបំណងធ្វើឲ្យនរណាម្នាក់ទាស់ចិត្តសោះឡើយ។ យើងទទួលស្គាល់ថា ការអត្ថាធិប្បាយ ដែលចង់បង្ហាញថា គ្រប់អ្នកគាំទ្រទាំងអស់របស់ក្រុម The Killers គឺជា «បងប្អូនប្រុសស្រី» នោះ អាចត្រូវបានយល់ច្រឡំ»។

ការនិយាយយោងដល់ចំណុចនោះ គឺសំដៅដល់សម្ដីរបស់ប្រធានក្រុមតន្ត្រីនេះ លោក Brandon Flowers ដែលបាននិយាយទៅទស្សនិកជនដ៏ណែនណាន់តាន់តាប់នោះ ដោយប្រាប់ថា លោកមិនចង់ឲ្យស្ថានការណ៍នេះប្រែក្លាយទៅជា «កំហឹង» នោះទេ៕