បាល់ទាត់៖ នៅថ្ងៃទី២៦ ខែឧសភាស្អែកនេះ នឹងមានការប្រកួតក្របខណ្ឌលីគកំពូលកម្ពុជា ២ប្រកួតដែលជាជំនួបបង្គ្រប់សប្ដាហ៍ទី៤ រួមមានក្រុមការពារតំណែងជើងឯកបឹងកេត ត្រូវជួបក្រុមម្ចាស់ផ្ទះសូលទីឡូអង្គរនៅកីឡដ្ឋាន SRU ខេត្តសៀមរាប ខណៈក្រុមវិសាខាត្រូវជួបក្រុមម្ចាស់ផ្ទះអគ្គិសនីកម្ពុជាវេលាម៉ោង ៣៖៣០នាទីរសៀលដូចគ្នា។
សម្រាប់ការប្រកួតរវាងក្រុមបឹងកេត និងសូលទីឡូអង្គរគឺជាជំនួបគួរឲ្យចាប់អារម្មណ៍ ដ្បិតក្រុមទាំងពីរនៅមិនទាន់ស្គាល់ជ័យជម្នះឡើយក្នុងរដូវកាលថ្មីនេះ ដោយក្រុមនាគខៀវបឹងកេត ចាញ់ ៣ប្រកួតជាប់គ្នា ខណៈសូលទីឡូអង្គរចាញ់ ៤ប្រកួតជាប់គ្នា។ ដូច្នេះការប្រកួតនេះក្រុមទាំងពីរទាមទារឈ្នះលើកដំបូងរៀងៗខ្លួន ពិសេសក្រុមការពារតំណែងជើងឯកបឹងកេត ដែលពុំទាន់មានពិន្ទុក្នុងដៃ។ ចំពោះការប្រកួតនេះនឹងមានផ្សាយផ្ទាល់ លើកញ្ចក់ទូរទស្សន៍ BTV-News។ ដោយឡែកក្រុមវិសាខាវិញនឹងត្រូវធ្វើការប្រកួត ក្រៅដីលើកដំបូងជាមួយក្រុមអគ្គិសនីកម្ពុជា បន្ទាប់ពីប្រកួតក្នុងដី ៣ប្រកួតឈ្នះ ១ និងស្មើ ២ រកបាន ៥ពិន្ទុ។ រីឯក្រុមអគ្គិសនីកម្ពុជាទើបប្រកួតបាន ៣ប្រកួតដូចគ្នាដោយឈ្នះ ១ និងចាញ់ ២ រកបាន ៣ពិន្ទុ។ ចំពោះការប្រកួតទី៤ របស់ក្រុមទាំងពីរនៅកីឡដ្ឋានអគ្គិសនីកម្ពុជានេះ នឹងមានផ្សាយផ្ទាល់ដោយគណៈកម្មការប្រកួតបាល់ទាត់ជាតិកម្ពុជា-CNCC។
សូមបញ្ជាក់ថា បន្ទាប់ពីបញ្ចប់ការប្រកួតនេះ លីគកំពូលកម្ពុជានឹងត្រូវផ្អាកការប្រកួតជាង ១ខែ ព្រោះក្រុមជម្រើសជាតិកម្ពុជាត្រូវបំពេញបេសកកម្ម ប្រកួតជម្រុះពានរង្វាន់បាល់ទាត់ពិភពលោកនៅបារ៉ែន បន្ទាប់មកក្លិបវិសាខា និងបឹងកេតត្រូវចូលរួមប្រកួតពានរង្វាន់ AFC Cup 2021។ តាមគម្រោងលីគកំពូលកម្ពុជានឹងត្រឡប់មកវិញនៅថ្ងៃទី៣ ខែកក្កដា ឆ្នាំ២០២១ ខាងមុខ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
