ក្រុមអ្នកស៊ើបអង្កេតឧបទ្ទវហេតុយន្តហោះ នៅប្រទេសម៉ាឡេស៊ី នាថ្ងៃសុក្រ (ទី១៨ ខែសីហា) នេះ កំពុងធ្វើការវិភាគលើឧបករណ៍ថតសំឡេង នៅបន្ទប់បើកបរ (CVR) របស់យន្តហោះធុនស្រាល ដែលបានធ្លាក់លើផ្លូវនៅក្បែររដ្ឋធានី ដោយបានសម្លាប់មនុស្សទាំងអស់ នៅលើយន្តហោះ ៨នាក់ និង ២នាក់ផ្សេងទៀត នៅលើដី។

វីដេអូឃ្លីបពីកន្លែងកើតហេតុ បានបង្ហាញថា យន្តហោះ Beechcraft Model 390 បានផ្ទុះជាដុំភ្លើងដោយសារការបុកទង្គិច នៅពេលដែលធ្លាក់មកដល់ដី កាលពីថ្ងៃព្រហស្បតិ៍ នៅក្នុងរដ្ឋ Selangor ភាគខាងលិចនៃរដ្ឋធានីគួឡាឡាំពួ Kuala Lumpur ដោយបង្កបានជាផ្សែងខ្មៅហុយចេញពីកន្លែងនោះ។

រដ្ឋមន្ត្រីសក្រសួងដឹកជញ្ជូនលោក Anthony Loke បាននិយាយ នៅថ្ងៃសុក្រនេះថា CVR ដែលត្រូវបានរកឃើញ កាលពីយប់ថ្ងៃព្រហស្បតិ៍ កំពុងត្រូវបានវិភាគ ហើយឧបទ្ទវហេតុនេះ នឹងត្រូវបានស៊ើបអង្កេត។

CVR កត់ត្រានូវអ្វី ដែលកើតឡើងនៅក្នុងបន្ទប់បើកយន្ដហោះ រួមទាំងការសន្ទនាចុងក្រោយរបស់អ្នកបម្រើលើយន្តហោះ និងសំឡេងផ្សេងៗទៀត។

ស្នងការនគរបាលម៉ាឡេស៊ី លោក Razarudin Husain បាននិយាយ នៅថ្ងៃសុក្រនេះថា ដូចយន្តហោះធុនតូចដទៃទៀតដែរ យន្តហោះនេះត្រូវបានបំពាក់តែ CVR ប៉ុណ្ណោះ ហើយមិនមានឧបករណ៍កត់ត្រាទិន្នន័យហោះហើរនោះទេ។ លោកបានប្រាប់ថា ប្រតិបត្តិការស្វែងរក បញ្ចប់បាន ៩៥ភាគរយ ហើយត្រូវបានរំពឹងថា នឹងបញ្ចប់ក្នុងថ្ងៃនេះ៕