ប្រទេសជប៉ុន បានឲ្យដឹង នៅថ្ងៃសុក្រ (ទី១៨ ខែសីហា) នេះ ថា ខ្លួនបានប្រញាប់ប្រញាល់ឲ្យបញ្ចេញយន្តហោះចម្បាំង បន្ទាប់ពីយន្តហោះប្រមូលព័ត៌មាន IL-38 របស់រុស្ស៊ី ២គ្រឿង ត្រូវបានប្រទះឃើញហោះហើរ នៅចន្លោះសមុទ្រជប៉ុន និងសមុទ្រចិនខាងកើត ជាទីដែលរុស្ស៊ី កំពុងល្បាត និងធ្វើសមយុទ្ធរួមគ្នាជាមួយចិន។

ក្រសួងការពារជាតិរុស្ស៊ី បាននិយាយនៅក្នុងសេចក្តីថ្លែងការណ៍ នៅថ្ងៃសុក្រនេះថា នាវាកងទ័ពជើងទឹករុស្ស៊ី និងចិន បាននិងកំពុងល្បាតរួមគ្នា នៅមហាសមុទ្រប៉ាស៊ីហ្វិក និងធ្វើសមយុទ្ធកងទ័ពជើងទឹក នៅសមុទ្រចិនខាងកើត។

ក្រសួងនេះបានឲ្យដឹងថា៖ «នៅសមុទ្រចិនខាងកើត សមយុទ្ធមួយត្រូវបានធ្វើឡើង ដើម្បីបំពេញបន្ថែមការផ្គត់ផ្គង់ទឹកដល់នាវា និងប្រេងឥន្ធនៈពីនាវាជំនួយ»។

ជាមួយគ្នានេះ ក្រសួងបានឲ្យដឹងបន្ថែមថា រុស្ស៊ី និងចិន ក៏បានធ្វើសមយុទ្ធប្រឆាំងនាវាមុជទឹក វាយលុកការវាយឆ្មក់តាមអាកាសរបស់សត្រូវ ធ្វើការហ្វឹកហ្វឺនជួយសង្គ្រោះ នៅសមុទ្រ និងអនុវត្តការហោះហើរឧទ្ធម្ភាគចក្រ ហើយនិងការចុះចត នៅលើនាវាចម្បាំង។

សកម្មភាពកងទ័ពអាកាសរុស្ស៊ី បានកើតឡើង មួយថ្ងៃបន្ទាប់ពីជប៉ុន បានប្រទះឃើញនាវាកងទ័ពជើងទឹករុស្ស៊ី និងចិន ឆ្លងកាត់ដែនទឹក ចន្លោះកោះអូគីណាវ៉ា និងមីយ៉ាកូភាគខាងត្បូងរបស់ប្រទេសជប៉ុន៕