ស៊ីហ្គេម៖ ឯកឧត្ដមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាអនុប្រធានអចិន្ត្រៃយ៍នៃគណៈកម្មាធិការជាតិ រៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) បានធ្វើការជំរុញ និងពន្លឿនការសាងសង់ភូមិកីឡាឲ្យបានទាន់ពេលវេលា ដើម្បីត្រៀមការប្រកួតកីឡាស៊ីហ្គេម និងអាស៊ានប៉ាហ្គេមឆ្នាំ២០២៣ នៅប្រទេសកម្ពុជា។
ឯកឧត្ដមរដ្ឋមន្ត្រីបានថ្លែងបែបនេះ បន្ទាប់ពីចុះពិនិត្យវឌ្ឍនភាពនៃការសាងសង់ភូមិកីឡា នៅក្នុងបរិវេណនៃពហុកីឡដ្ឋានជាតិមរតកតេជោ កាលពីថ្ងៃទី២៤ ខែឧសភា ឆ្នាំ២០២១ អមដំណើរដោយអ្នកឧកញ៉ា សៀ ឬទ្ធី ថ្នាក់ដឹកនាំក្រុមហ៊ុន World Bridge Sport Village ដែលទទួលបានសិទ្ធពីរាជរដ្ឋាភិបាល ក្នុងការសាងសង់គម្រោងនេះផងដែរ។ ឯកឧត្ដម ថោង ខុន បានជំរុញក្រុមហ៊ុនឲ្យពន្លឿនការសាងសង់កន្លែងស្នាក់នៅ និងកំណត់ទីតាំងអាហារដ្ឋានសម្រាប់បម្រើឲ្យប្រតិភូកីឡា និងអត្តពលិកសរុបប្រមាណ ១ម៉ឺននាក់ដែលនឹងមកចូលរួមការប្រកួតកីឡាស៊ីហ្គេម និងអាស៊ានប៉ារ៉ាហ្គេមឆ្នាំ២០២៣ នៅកម្ពុជា។ លើសពីនេះ លោកក៏បានផ្ដល់ទំនុកចិត្តបន្ថែមដល់ក្រុមហ៊ុន ដោយការជួយសម្របសម្រួលការងាររដ្ឋបាល ការងារជំនាញ និងដោះស្រាយការងារប្រឈមមួយចំនួន អំឡុងពេលសាងសង់ដើម្បីកុំឲ្យរាំងស្ទះ និងសម្រេចការសាងសង់តាមផែនការទៀតផង។
ទន្ទឹមជាមួយគ្នា អ្នកឧកញ៉ា សៀ ឬទ្ធី តំណាងក្រុមហ៊ុនសាងសង់ World Bridge Sport Village បានសម្ដែងការអរគុណចំពោះការយកចិត្តទុកដាក់ និងផ្ដល់ភាពកក់ក្ដៅរបស់ថ្នាក់ដឹកនាំ ហើយលោកបានប្ដេជ្ញាចិត្តចំពោះមុខឯកឧត្ដមរដ្ឋមន្ត្រីដោយអះអាងថា នឹងខិតខំសាងសង់គម្រោងភូមិកីឡានេះឲ្យទាន់ពេលវេលាកំណត់នៅចុងឆ្នាំ២០២២ តាមរយៈការសម្រុកធ្វើការងារទាំងយប់ទាំងថ្ងៃ ទោះបីស្ថិតក្នុងកាលៈទេសៈនៃការរីករាលដាលជំងឺកូវីដ-១៩ ក៏ដោយ ក៏គម្រោងនៅតែបន្តការសាងសង់ជាប់ជានិច្ច។ គួរបញ្ជាក់ថា ភូមិកីឡាកំពុងសាងសង់លើផ្ទៃដីប្រមាណ ៨ហិចតាដោយនឹងសាងសង់ជាបន្ទប់ និងខុនដូសរុបជាង ១,៧០០បន្ទប់បំពាក់ដោយគ្រឿងបរិក្ខារទំនើបៗ ហើយជាតំបន់បៃតងដែលមានទីធ្លាធំទូលាយ មានផ្សារទំនើប និងសាលធំៗអាចប្រើប្រាស់ជាការប្រកួតកីឡាបាន។ មិនតែប៉ុណ្ណោះក៏មានរៀបចំសារមន្ទីរស៊ីហ្គេម ដើម្បីផ្ទុកនូវអនុស្សាវរីយ៍ដែលកម្ពុជា ធ្លាប់ដណ្ដើមបានពីស៊ីហ្គេមមុនៗទៀតផង។ ភូមិកីឡាគឺជាកន្លែងស្នាក់នៅ និងហូបចុករួមដ៏ធំសម្រាប់ត្រៀមស្វាគមន៍ប្រតិភូកីឡា និងអត្តពលិកស៊ីហ្គេម និងអាស៊ានប៉ារ៉ាហ្គេមឆ្នាំ២០២៣ ខាងមុខ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
