អ្នកនាំពាក្យម្នាក់ និងប្រភពមួយ បាននិយាយកាលពីថ្ងៃសុក្រថា នគរបាលប្រទេសប៉ាគីស្ថាន បានចាប់ខ្លួនបងប្អូនប្រុសពីរនាក់ជាគ្រិស្តសាសនិក ដែលត្រូវបានចោទប្រកាន់ពីបទប្រមាថគម្ពីរពិសិដ្ឋ រយៈពេលពីរថ្ងៃបន្ទាប់ពីក្រុមមនុស្សឥតសណ្តាប់ធ្នាប់ជាពលរដ្ឋមូស្លីមមួយក្រុមបានដុតព្រះវិហារ និងលំនៅឋាន ដោយបានដាក់កំហុសលើបុរសទាំងពីរនាក់ពីបទប្រមាថគម្ពីរកូរ៉ាន។

នគរបាលបាននិយាយថា គម្ពីរកូរ៉ានជាច្រើនទំព័រ ត្រូវបានគេរកឃើញនៅតាមដងផ្លូវ ដោយមានការអត្ថាធិប្បាយប្រមាថមើលងាយ សរសេរលើទំព័រគម្ពីជាពណ៌ក្រហម។ ស្នងការនគរបាលខេត្តលោក Usman Anwar បាននិយាយថា ទំព័របន្ថែមដែលមានភ្ជាប់មួយទំព័រ បានសរសេរឈ្មោះ អាស័យដ្ឋាន និងលេខអត្តសញ្ញាណប័ណ្ណជាតិរបស់ជនដែលត្រូវចោទប្រកាន់ផងដែរ។

លោកបានប្រាប់សារព័ត៌មានរ៉យទ័រថា នគរបាលបានស៊ើបអង្កេតគ្រប់ជ្រុងជ្រោយទាំងអស់ អំពីមូលហេតុដែលឈ្មោះ និងអាស័យដ្ឋាននឹងត្រូវបានភ្ជាប់។ អ្នកនាំពាក្យរដ្ឋាភិបាល បាននិយាយថា តុលាការបានបង្គាប់ឲ្យឃុំខ្លួនជនសង្ស័យទាំងពីរនាក់ក្នុងមន្ទីឃុំឃាំងរបស់នគរបាលរយៈពេល ៧ ថ្ងៃ ដើម្បីសាកសួរ។ ទន្ទឹមនឹងនេះ ក្រុមអ្នកតវ៉ាគ្រិស្តសាសនិកមួយក្រុម បានប្រមូលផ្តុំគ្នានៅទីក្រុង Karachi ដើម្បីថ្កោលទោសឧបទ្ទវហេតុនេះ ដោយកាន់ស្លាកសញ្ញា និងស្រែកថា «បញ្ឈប់ការញុះញង់សាសនា»។