មន្ត្រីរបស់ក្រុង Los Angeles កាលពីថ្ងៃសុក្រ (ទី១៨ ខែសីហា) បានព្រមានអ្នកស្រុកឲ្យរួសរាន់ត្រៀមខ្លួនទប់ទល់នឹងការបក់បោកជិតចូលមកដល់របស់ព្យុះសង្ឃរា Hilary ជាព្យុះបែបនេះទី១ ដែលគំរាមកំហែងដល់ភាគខាងត្បូងរដ្ឋកាលីហ្វ័រញ៉ារបស់សហរដ្ឋអាមេរិក ចាប់តាំងពីឆ្នាំ១៩៣៩ មក។

លោក Robert Luna នាយតម្រួតតំបន់ក្រុង Los Angeles បាននិយាយ នៅក្នុងសន្និសីទសារព័ត៌មានពេលរសៀលថា៖ «ខ្ញុំមិនចង់ឲ្យមនុស្សមានការភិតភ័យទេនោះ។ យើងត្រូវរកឲ្យឃើញនូវចំណុចដ៏សមរម្យ រវាងប្រតិកម្មហួសហេតុ។ ប៉ុន្តែយើងត្រូវត្រៀមខ្លួនឲ្យរួចរាល់»។

មជ្ឈមណ្ឌលតាមដានខ្យល់ព្យុះសង្ឃរាជាតិរបស់សហរដ្ឋអាមេរិក បានឲ្យដឹងថា Hilary ដែលជាព្យុះសង្ឃរាប្រភេទទី៤ ត្រូវបានគេព្យាករថា នឹងថមថយឥទ្ធិពលទៅជាព្យុះត្រូពិច នៅពេលដែលវាផ្លាស់ទីទៅភាគខាងកើតនៃទីក្រុង Los Angeles នៅល្ងាចថ្ងៃអាទិត្យ ឬនៅថ្ងៃចន្ទ។ ប៉ុន្តែទីក្រុង និងជាយក្រុង នៅតែស្ថិតក្នុងរង្វង់ឥទ្ធិពលនៃការបំផ្លិចបំផ្លាញរបស់ព្យុះនេះ។

ប្រធាននាយកដ្ឋានពន្លត់អគ្គិភ័យរបស់ក្រុង Los Angeles លោក Anthony Marrone បានប្រាប់អ្នកស្រុកឲ្យត្រៀមលក្ខណៈ សម្រាប់ការដួលរលំដើមឈើ ក៏ដូចជាខ្សែចរន្តអគ្គិសនីដែលដាច់ធ្លាក់ ខណៈដែលព្យុះដែលខ្សោយឥទ្ធិពល បានបង្កឲ្យមានកម្លាំងខ្យល់បក់ក្នុងល្បឿន ៤០ម៉ាយល៍ (ជាង ៦៤គីឡូម៉ែត្រ) ក្នុងមួយម៉ោង ជាមួយនឹងកំសួលខ្យល់បក់មួយវឹបយ៉ាងខ្លាំង លើផ្នែកដ៏ធំនៃរដ្ឋកាលីហ្វ័រញ៉ាភាគខាងត្បូង៕