ភ្នំពេញ៖ ក្រសួងការពារជាតិ អះអាងថា ប្រជាពលរដ្ឋនៅរាជធានីភ្នំពេញដល់ទៅជាង ៧៧ម៉ឺននាក់ហើយ បានទទួលការចាក់វ៉ាក់សាំងបង្ការជំងឺកូវីដ-១៩ នៅក្នុងយុទ្ធនាការរយៈពេល ២៤ថ្ងៃកន្លងមកនេះ។
ក្រសួងការពារជាតិបានឱ្យដឹងបែបនេះនៅក្នុងរបាយការណ៍ប្រចាំថ្ងៃរបស់អនុគណៈកម្មការចំពោះកិច្ចការចាក់វ៉ាក់សាំងបង្ការជំងឺកូវីដ-១៩ ដែលស្ថិតក្រោមការដឹកនាំរបស់ក្រសួងមួយនេះ។
បើតាមរបាយការណ៍ដដែលនេះ ប្រជាពលរដ្ឋជាង ៧៧ម៉ឺននាក់ នៅក្នុងខណ្ឌចំនួន ៦នៅរាជធានីភ្នំពេញ បានទទួលវ៉ាក់សាំងយ៉ាងហោចណាស់ដូសទី១រួចមកហើយ។
របាយការណ៍នេះ ឱ្យដឹងទៀតថា ពលរដ្ឋជាង ៣៨ម៉ឺននាក់ហើយ បានទទួលការចាក់វ៉ាក់សាំងទាំងពីរដូសរួចរាល់ហើយ។
ក្រសួងការពារជាតិ បានឱ្យដឹងផងដែរថា ក្រសួងបានផ្ដល់វ៉ាក់សាំងដល់ប្រជាពលរដ្ឋសរុបដល់ទៅជាង ១លាន ៧ម៉ឺននាក់ហើយនៅទូទាំងប្រទេស ក្នុងនោះពលរដ្ឋជាង ៦៦ម៉ឺននាក់បានទទួលការចាក់វ៉ាក់សាំងទាំងពីរដូសរួចរាល់ហើយនៅក្នុងការអនុវត្តយុទ្ធនាការចាក់វ៉ាក់សាំងទូទាំងប្រទេសកន្លងមកនេះ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
