កំពង់ស្ពឺ ÷[ឯកឧត្តម លេង ផាលី ប្រធានប្រតិបត្តិក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី បាននាំយកអំណោយដ៏ថ្លៃថ្លារបស់ឯកឧត្តម ហ៊ុន ម៉ានី ប្រធានកិត្តិយសក្រុមការងារគ្រូពេទ្យស្ម័គ្រចិត្ដឯកឧត្តម ហ៊ុន ម៉ានី ជូនប្រជាពលរដ្ឋរងគ្រោះដោយទឹកជំនន់ ចំនួន៥៣គ្រួសារ នៅឃុំតាសាល ស្រុកឱរ៉ាល់ ខេត្តកំពង់ស្ពឺ។

ថ្លែងទៅកាន់ប្រជាពលរដ្ឋរងគ្រោះដោយសារទឹកជំនន់ នាពេលកន្លងមក នាព្រឹកថ្ងៃទី១៩ ខែសីហា ឆ្នាំ២០២៣នេះ ឯកឧត្តម លេង ផាលី ថា ថ្ងៃនេះ ក្រុមការងារ បាននាំយកអំណោយដ៏ថ្លៃរបស់ឯកឧត្តម ហ៊ុន ម៉ានី មកប្រគល់ជូនបងប្អូនប្រជាពលរដ្ឋ លោកតា លោកយាយ អ៊ុំ ពូ មាមីងផ្ទាល់ដៃដែលរងផលប៉ះពាល់ដោយសារទឹកជំនន់ ក្នុងមួយគ្រួសារៗ ទទួលបានអង្ករ ២៥គីឡូក្រាម ទឹកត្រី ទឹកស៊ីអ៊ីវ មី ត្រីខ ប៊ីចេង ស្ករស សាប៊ូ និងប្រគេនបច្ច័យចំនួន៨០ម៉ឺនរៀលទៅវត្តជាំ ដោយសហការជាមួយ ក្រុមការងារថ្នាក់កណ្តាលចុះជួយឃុំ ស្រុក សហភាពសហព័ន្ធយុវជនកម្ពុជា និងអាជ្ញាធរឃុំ-ស្រុក ដែលពាក់ព័ន្ធ។

ឯកឧត្តម លេង ផាលី បានបន្តថា ឯកឧត្តម ហ៊ុន ម៉ានី តែងតែគិតគូរជានិច្ចដល់សុខទុក្ខ និងជីវភាពរស់នៅរបស់ប្រជាពលរដ្ឋក្នុងខេត្តកំពង់ស្ពឺ ជាពិសេសនោះចំពោះប្រជាពលរដ្ឋរងគ្រោះ ងាយរងគ្រោះដែលជួបការលំបាកដោយប្រការផ្សេងៗ នៅគ្រប់ទីកន្លែងទាំងអស់ផងដែរ។

 តមកនៅព្រឹកថ្ងៃដដែលឯកឧត្តម លេង ផាលី ប្រធានប្រតិបត្តិក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី បានដឹកនាំក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ចំនួន៨៩នាក់ ចុះពិនិត្យ ព្យាបាលជំងឺ ចែកឱសថជូនប្រជាពលរដ្ឋ ដោយឥតគិតថ្លៃ បានចំនួន១១៧៨នាក់ ស្រី៧១៨នាក់ និងបាននាំយក រទេះជនពិការ ចំនួន៥គ្រឿង  ដែលជាអំណោយដ៏ថ្លៃថ្លារបស់ឯកឧត្តម ហ៊ុន ម៉ានី ប្រធានកិត្តិយសក្រុមការងារគ្រូពេទ្យស្ម័គ្រចិត្ដឯកឧត្តម ហ៊ុន ម៉ានី ជូនប្រជាពលរដ្ឋពិការភាព ចំនួន៥នាក់ នៅតំបន់ដាច់ស្រយាលរលាក់កងជើង ក្នុងភូមិតាំងបំពង់ ឃុំតាសាល ស្រុកឱរ៉ាល់ ខេត្តកំពង់ស្ពឺ។

លោកវេជ្ជបណ្ឌិត សាយ ឬទ្ធី អនុប្រធានប្រតិបតិ្តក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី សូមចូលរួមអបអរសាទរជាមួយប្រជាពលរដ្ឋភូមិតាំងបំពង់ ដែលទទួលបានជ័យលាភីលេខ១ ជាភូមិដ៏ឆ្នើមនៅក្នុងស្រុកឱរ៉ាល់ ក៏ដូចជានៅក្នុងឃុំតាសាល ដែលបានបោះឆ្នោតជូនគណបក្សប្រជាជនកម្ពុជា ទទួលបានរហូតដល់៩៩.៥២% ដែលជាចំនួនដ៏ខ្ពស់ជាងគេបំផុតនៅក្នុងខេត្ត។ ជាពិសេសបំផុតនោះ គឺជាភូមិដែលឋិតនៅក្នុងដួងចិត្តរបស់ឯកឧត្តម ហ៊ុន ម៉ានី ដែលលោកយកចិត្តទុកដាក់ ព្រោះជាភូមិស្ថិតនៅចុងបំផុតរបស់ស្រុកឱរ៉ាល់ ខេត្តកំពង់ស្ពឺ និងជាផ្លូវទៅកាន់ភ្នំខ្នងផ្សារ។ ហើយថ្មីៗនេះ ឯកឧត្តម ហ៊ុន ម៉ានី បានជួយសាងសង់ស្ពាន និងរួចរាល់ជាស្ថាពរ ក៏បានធ្វើពិធីសម្ពោធដាក់ឲ្យប្រើប្រាស់ជាផ្លូវការរួចរាល់ ដែលមានប្រវែង១៥ម៉ែត្រ ទទឹង៩ម៉ែត្រ និងប្រសិទ្ធនាមថា ស្ពានភ្ជាប់និស្ស័យជាមួយអ្នកឃុំតាសាល បានជួយដល់ប្រជាពលរដ្ឋឆ្លងកាត់ និងសិស្សានុសិស្ស លែងឆ្លងទឹក ទៅរៀននៅសាលាបឋមសិក្សា និងអនុវិទ្យាល័យទៀតហើយ។

ជាមួយគ្នានោះដែរឯកឧត្តម លេង ផាលី ប្រធានប្រតិបត្តិក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី បានបញ្ជាក់ថា ក្នុងរយៈពេល ១១ឆ្នាំ (០២ ធ្នូ ឆ្នាំ២០១២ ដល់ ១៩ សីហា ឆ្នាំ២០២៣) ក្រោមការដឹកនាំដ៏ខ្ពង់ខ្ពស់ដោយផ្ទាល់ ការចង្អុលបង្ហាញជាប្រចាំ ប្រកបដោយទស្សនវិស័យវែងឆ្ងាយ និងប្រាកដប្រជាគួរឱ្យគោរពកោតសរសើរ របស់ឯកឧត្តម ហ៊ុន ម៉ានី ប្រធានគណៈកម្មការទី៧នៃរដ្ឋសភាជាតិ និងជាប្រធានកិត្តិយសក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ដែលមានក្រុមគ្រូពេទ្យចំនួន ១២,០៦៩នាក់ (មួយម៉ឺន ពីរពាន់ ហុកសិប ប្រាំបួននាក់) ក្នុងនោះស្ត្រីមានចំនួន ៦,៤៩៥នាក់ (ប្រាំមួយពាន់បួនរយកៅសិបប្រាំនាក់) បានបំពេញបេសកកម្មដ៏ថ្លៃថ្លាដោយទទួលបានលទ្ធផលប្រកបដោយប្រសិទ្ធភាព និងប្រសិទ្ធផលជាច្រើនឥតគណនា ក្នុងការចូលរួមអប់រំផ្សព្វផ្សាយ ចាក់វ៉ាក់សាំងបង្ការកូវីដ-១៩ ក្នុងក្របខណ្ឌទូទាំងប្រទេស បណ្តុះបណ្តាលវគ្គសង្គ្រោះបឋម យកសំណាករកវីរុសកូវីដ-១៩ និងពិនិត្យ ព្យាបាលជំងឺជូនប្រជាពលរដ្ឋដោយឥតគិតថ្លៃ ក្នុង ២៥ រាជធានី-ខេត្ត បានចំនួន ១១១៨លើក ក្នុងនោះពិនិត្យ និងព្យាបាលជំងឺជូនប្រជាពលបានចំនួន ១១,៨៨៦,៩៨២នាក់ (ដប់មួយលានប៉ែតសិបប្រាំបីម៉ឺន ប្រាំមួយពាន់ ប្រាំបួនរយ ប៉ែតសិបពីរ នាក់) ក្នុងនោះស្ត្រីមានចំនួន ៦,០៧៩,៦៣៥នាក់ (ប្រាំមួយលាន ប្រាំពីរម៉ឺន ប្រាំបួនពាន់ ប្រាំមួយរយ សាមសិបប្រាំ នាក់)  ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ចំនួន ៤,៦០១នាក់ បាននិងកំពុងស្ម័គ្រចិត្តចុះបេសកកម្មតាមការឧទ្ទេសនាមរបស់គណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ-១៩ ដោយឥតគិតថ្លៃ និងឥតគិតថវិកាបេសកកម្ម គិតតាំងពីចាប់ផ្តើមចាក់វ៉ាក់សាំងដំបូងពីខែមីនា ឆ្នាំ២០២១ មកដល់បច្ចុប្បន្នជូនប្រជាពលរដ្ឋតាមមូលដ្ឋាននានាក្នុង២៥ រាជធានី-ខេត្ត ដោយចាក់វ៉ាក់សាំងបានចំនួន ១០,៦៤៨,៧៥០ដូស (ដប់លានហុកសិបបួនម៉ឺនប្រាំបីពាន់ប្រាំពីររយហាសិប ដូស)ក្នុង២៥ រាជធានី-ខេត្ត បានចំនួន ២ ភាគ ៣ នៃប្រជាជនសរុបទូទាំងប្រទេសចំនួន ១៧,០៩១,៤៦៤ នាក់ (ដប់ប្រាំពីរលាន ប្រាំបួនម៉ឺន មួយពាន់ បួនរយ ហុកសិប បួននាក់) ធៀបនឹងឆ្នាំ២០២៣។ បើគិតសេវាជាមធ្យម ប្រជាពលរដ្ឋក្នុងម្នាក់ ចំណាយអស់ ៥០ដុល្លារ សរុបត្រូវចំណាយទាំងអស់ប្រហែល ៥៩៤,៣៤៩,១០០ដុល្លារ (ប្រាំរយកៅសិបបួនលាន សាមសិបបួនម៉ឺន ប្រាំបួនពាន់ មួយរយ ដុល្លារសហរដ្ឋអាមេរិក)៕ អត្ថបទ រដ្ឋា