​បាល់ទាត់៖ ​ក្រុម​តោ​ខៀវ Chelsea បាន​ចាប់ផ្តើម​ហ្វឹកហាត់​ភ្លាមៗ​បន្ទាប់ពី​បញ្ចប់​រដូវ​កាល English Premier League កាលពី​ថ្ងៃអាទិត្យ ដើម្បី​ត្រៀមលក្ខណៈ​សំរាប់​ការប្រកួត​វគ្គ​ផ្តាច់ព្រ័ត្រ UEFA Champions League ចុង​សប្តាហ៍​នេះ​ទល់នឹង Manchester City​។

​​ក្រុម​របស់លោក Thomas Tuchel មិន​បង្អង់​ពេល​យូរ​ឡើយ ដោយបាន​ប្រមូលផ្តុំ​កីឡាករ​ហ្វឹកហាត់​ជុំគ្នា​ភ្លាមៗ​ក្រោម​ដំនក់ទឹកភ្លៀង បន្ទាប់ពី​ពួកគេ​បាន​ធូរទ្រូង​កាលពី​ថ្ងៃអាទិត្យ ​ទោះ​ចាញ់​នៅ​ទឹកដី Aston Villa តែ​នៅ​អាច​រក្សា​តំណែងលេខ ៤ បាន​ដើម្បី​មានមុខ​នៅ UCL ឆ្នាំក្រោយ​បន្ទាប់ពី Leicester City ចាញ់ Tottenham Hotspur ក្នុង​សប្តាហ៍​ចុងក្រោយ​។ ​​តាំងពី​ធានាបាន​កៅអី​វគ្គ​ផ្តាច់ព្រ័ត្រ​រដូវ​កាល​នេះ Chelsea ស្គាល់​ជ័យជំនះ​តែ ១​ប្រកួត​ទេ​ក្នុង ៤​ប្រកួត​ចុងក្រោយ​ដែល​បូករួម​ទាំង​ចាញ់ Leicester City នៅ​វគ្គ​ផ្តាច់ព្រ័ត្រ FA Cup​។ ​​អ្នកចាត់ការ Chelsea លោក Thomas Tuchel បានបង្ហាញ​ធូរស្បើយ​បន្តិច​ បន្ទាប់ពី​ស្ថានភាព​របួស​ត្រកៀក​របស់​អ្នកចាំទី Edouard Mendy បាន​ធូរស្រាល​។

​​Mendy បាន​ប៉ះទង្គិច​ជាមួយ Bertrand Traore ក្នុង​បរាជ័យ​នៅ​ទឹកដី Aston Villa កាលពី​ថ្ងៃអាទិត្យ​ និង​ត្រូវបានផ្លាស់ចេញ​ជំនួស​ដោយ Kepa Arrizabalaga​។ ​​ដោយ​ស្ថានភាព​កីឡាករ​ផ្សេង​ទៀត​របស់ Chelsea លោក Tuchel ក៏​មិនទាន់​ច្បាស់​ពី​ខ្សែបំរើ​បារាំង N’Golo Kante ថា​នឹង​អាចជួយ​ក្រុម​បាន ​រឺ​យ៉ាងណា​ចុង​សប្តាហ៍​នេះ​។ ​Chelsea នឹងត្រូវ​ជួប​ក្រុម​ជើងឯក Premier League, Manchester City ថ្ងៃ​សៅរ៍​នេះ​ក្នុង​វគ្គ​ផ្តាច់ព្រ័ត្រ​នៅ​ទីក្រុង Porto ប្រទេស​ព័រទុយហ្កាល់​៕

​អត្ថបទ​៖​នាង សុភា​វុ​ធ