កេនយ៉ា ៖ តម្លៃស្រូវ ដែលដាំដុះនៅប្រទេសកេនយ៉ា បានឡើងថ្លៃមួយរយៈមុននេះ ដោយសារតែតម្លៃជីកើនឡើងកាន់តែខ្ពស់ និងគ្រោះរាំងស្ងួតអស់រយៈពេលជាច្រើនឆ្នាំនៅតំបន់អាហ្វ្រិក ដែលបានកាត់បន្ថយផលិតកម្មអង្ករ។ 

អង្ករតម្លៃថោក ដែលនាំចូលពីប្រទេសឥណ្ឌាបានបំពេញចន្លោះនេះ ដោយផ្តល់អាហារដល់ប្រជាជនរាប់សែននាក់នៅក្នុងតំបន់អនាធិបតេយ្យ Kibera ក្នុងទីក្រុងណៃរ៉ូប៊ី ដែលរស់នៅដោយចំណាយតិចជាង២ដុល្លារក្នុងមួយថ្ងៃ។ ប៉ុន្តែការរឹតបន្តឹងការនាំចេញអង្កររបស់ប្រទេសឥណ្ឌា បានបណ្ដាលឲ្យមានកង្វះខាតស្បៀងអាហារនៅទូទាំងពិភពលោក ជាពិសេសតំបន់ងាយរងគ្រោះនៅទ្វីបអាហ្វ្រិក។

តម្លៃអង្ករមួយបាវ ដែលមានទម្ងន់២៥គីឡូក្រាម បានឡើងថ្លៃចំនួន២០%ចាប់តាំងពីខែមិថុនាមក។ ក្រុមហ៊ុនលក់ដុំមិនទាន់ទទួលបានស្តុកថ្មីនៅឡើយទេ ចាប់តាំងពីប្រទេសឥណ្ឌា ដែលជាប្រទេសនាំចេញអង្ករដ៏ធំបំផុតរបស់ពិភពលោកមកទល់ពេលនេះ បាននិយាយកាលពីខែមុនថា ខ្លួននឹងហាមឃាត់ការនាំចេញអង្ករមួយចំនួន។

នេះជាការខិតខំប្រឹងប្រែងរបស់ ប្រទេសដែលមានប្រជាជនច្រើនជាងគេលើពិភពលោកមួយនេះ ក្នុងការគ្រប់គ្រងតម្លៃអង្ករក្នុងស្រុកនៅមុនឆ្នាំបោះឆ្នោតដ៏សំខាន់មួយ ប៉ុន្តែការរឹតបន្តឹងនេះបានបន្សល់ទុកនូវគម្លាតដ៏គួរឱ្យភ្ញាក់ផ្អើលប្រហែល១០,៤តោន ដែលមនុស្សជុំវិញពិភពលោកត្រូវការ ពោលគឺប្រហែល២០%នៃការនាំចេញអង្កររបស់ពិភពលោក។

ជាមួយគ្នានេះ ប្រទេសអារ៉ាប់រួម បានផ្អាកការនាំចេញអង្ករដើម្បីរក្សាស្តុកក្នុងស្រុករបស់ខ្លួន ហើយការគំរាមកំហែងមួយទៀត គឺបញ្ហាអាកាសធាតុធ្ងន់ធ្ងរបំផ្លាញដំណាំស្រូវក្នុងប្រទេសផ្សេងៗទៀត ដែលទាំងនេះជាកត្តាជះឥទ្ធិពលលើសន្តិសុខស្បៀងអាហារពិភពលោក៕