ថៃ ៖ គណបក្សភឿថៃ (Pheu Thai) របស់ប្រទេសថៃ នៅ បានឲ្យដឹងថា កិច្ចខិតខំប្រឹងប្រែង ដើម្បីដឹកនាំបង្កើតរដ្ឋាភិបាលបន្ទាប់ ទទួលបានការគាំទ្រពីគណបក្សចំនួន ១៤ ក្នុងនោះរួមទាំងគណបក្សចំនួន ២ ដែលមានសម្ព័ន្ធភាពជាមួយគូប្រជែងយោធារបស់ខ្លួនផងដែរ ដោយការលើកឡើងនេះ មានរយៈពេល មួយថ្ងៃមុនការបោះឆ្នោតសភា សម្រាប់ជ្រើសរើសនាយករដ្ឋមន្ត្រីថ្មី។

សភាទាំងពីររបស់ប្រទេសថៃ ត្រូវបានជាប់គាំងអស់ជាច្រើនសប្តាហ៍ ជុំវិញការបង្កើតរដ្ឋាភិបាលថ្មី បន្ទាប់ពីការបោះឆ្នោតកាលពីថ្ងៃទី១៤ ខែឧសភា ដែលគ្រប់ដណ្ដប់ដោយសមាជិករបស់អតីតគណបក្សប្រឆាំងពីរ គឺគណបក្សលេខ១ បោះជំហានទៅមុខ (Move Forward) និងគណបក្សលេខ២ ភឿថៃ។

យោងតាមលោក ផុំថាំ វេឆះយ៉ាឆៃ (Phumtham Wechayachai) ដែលជាអនុប្រធានគណបក្សភឿថៃ បានឲ្យដឹងថា មហាសេដ្ឋីអចលនទ្រព្យ លោក សេដ្ឋា ថាវីស៊ីន (Srettha Thavisin) របស់គណបក្សប្រជានិយមមួយនេះ មានការគាំទ្រពីគណបក្សចំនួន ១៤ ដើម្បីក្លាយជានាយករដ្ឋមន្ត្រី នៅក្នុងការបោះឆ្នោតសភា នៅថ្ងៃអង្គារ (ទី២២ ខែសីហា) ស្អែកនេះ។

គណបក្ស ដែលជាមរតករបស់លោកថាក់ស៊ីន ស៊ីណាវ៉ាត់មួយនេះ បានលេចឡើងយ៉ាងត្រដែត ក្នុងការបង្កើតរដ្ឋាភិបាលថ្មីរបស់ប្រទេសថៃ បន្ទាប់ពីកិច្ចប្រឹងប្រែងរបស់គណបក្សបោះជំហានទៅមុខ បានបរាជ័យ កាលពីខែមុន ដោយត្រូវបានជំទាស់យ៉ាងខ្លាំងក្លាពីក្រុមអភិរក្សនិយម ចំពោះរបៀបវារៈរបស់ខ្លួន។

គណបក្សដែលឈ្នះការបោះឆ្នោតសកល គឺគណបក្សបោះជំហានទៅមុខ បាននិយាយថា ខ្លួននឹងមិនគាំទ្រកិច្ចប្រឹងប្រែងពហុបក្សរបស់គណបក្សភឿថៃទេ ដោយលើកហេតុផលថា ទង្វើនោះបំភ្លៃលទ្ធផលបោះឆ្នោតហើយផ្ទុយនឹងឆន្ទៈសាធារណជន៕