អាមេរិក ៖ ទីក្រុង San Franciscoសហរដ្ឋអាមេរិក បានដាក់ឲ្យប្រើប្រាស់សេវាកម្មរថយន្តក្រុងស្វ័យបើកបរ រយៈពេលតិចជាង១សប្តាហ៍ប៉ុណ្ណោះ ក្រោយក្រុមនិយ័តកររដ្ឋកាលីហ្វ័រនីញ៉ា អនុម័តការពង្រីករថយន្តឈ្នួលរូបយន្ត បើទោះបីជាមានក្តីកង្វល់ពីសុវត្ថិភាព និងការធ្វើចរាចរណ៍ក៏ដោយ ។  

រថយន្តក្រុងសេរី នឹងរត់រាល់ថ្ងៃនៅលើកំណាត់ផ្លូវ Loopនៅជុំវិញកោះ Treasure ជាទីតាំងរបស់អតីតមូលដ្ឋានកងទ័ពជើងទឹកសហរដ្ឋអាមេរិក ស្ថិតនៅកណ្តាលឆកសមុទ្រ San Francisco ។  

កំណាត់ផ្លូវ Loop មានចំណតឈប់ចំនួន ៧កន្លែង តភ្ជាប់សង្កាត់រស់នៅជាមួយហាងលក់ទំនិញ និងមជ្ឈមណ្ឌលសហគមន៍ ។ មនុស្សប្រហែល ២ពាន់នាក់ រស់នៅលើកោះមួយនេះ ។  

រថយន្តក្រុងអគ្គិសនីទាំងអស់នេះ ដែលគ្មានកៅអី ឬចង្កូតអ្នកបើកបរ មានបុគ្គលិកតែម្នាក់គត់ដែលអាចបើករថយន្តក្រុងដោយប្រើឧបករណ៍បញ្ជា បើសិនជាចំាបាច់ ។  

លោក Tilly Changគឺជាប្រធានប្រតិបត្តិក្រុមអាជ្ញាធរដឹកជញ្ជូនស្រុក San Franciscoនិយាយថា មានបុគ្គលិកនៅលើរថយន្តក្រុងនឹងធ្វើឲ្យអ្នករាល់គ្នាមានអារម្មណ៍ស្រួល និងមានទំនុកចិត្ត ។  

សូមបញ្ជាក់ថា ទីក្រុង San Franciscoស្ថិតនៅក្នុងចំណោមទីក្រុងជាច្រើនទៀត នៅលើពិភពលោក ដែលធ្វើតេស្តសុវត្ថិភាព និងរថយន្តស្វ័យបើកបរ ដើម្បីផ្លាស់ប្តូរការដឹកជញ្ជូនសាធារណៈ ៕