ចិន ៖ ក្រសួងការបរទេសចិន បានឲ្យដឹង នៅពីថ្ងៃចន្ទ (ទី២១ ខែសីហា) នេះ ថា ទីក្រុងប៉េកាំង បានយល់ព្រមឲ្យក្រុមហ៊ុនអាកាសចរណ៍រដ្ឋរបស់ប្រទេសកូរ៉េខាងជើង Air Koryo ចាប់ផ្ដើមការហោះហើរទៅកាន់ប្រទេសចិនឡើងវិញ។

តែក្រសួងមិនបានផ្តល់ព័ត៌មានលម្អិតបន្ថែម ដូចជាកាលបរិច្ឆេទនៃការចាប់ផ្តើមឡើងវិញ ឬភាពញឹកញាប់នៃការហោះហើរប្រចាំសប្តាហ៍ ដោយបានបង្វែរសំណួរបន្ថែមទៅកាន់និយតករអាកាសចរណ៍របស់ប្រទេសចិន ដែលមិនអាចទាក់ទងបានភ្លាមៗ ដើម្បីផ្តល់ការអត្ថាធិប្បាយនោះឡើយ។ ចំណែកការិយាល័យ នៅក្រុងស៊ាងហៃរបស់ក្រុមហ៊ុនអាកាសចេណ៍ Air Koryo ក៏មិនឆ្លើយតបនឹងសំណើសុំការអត្ថាធិប្បាយដូចគ្នាដែរ។

ការអនុម័តនេះ ធ្វើឡើងបន្ទាប់ពីទីភ្នាក់ងារសារព័ត៌មាន Yonhap របស់កូរ៉េខាងត្បូង បានផ្សព្វផ្សាយថា ព្រំដែនកូរ៉េខាងជើង-ចិន កំពុងបើកដំណើរការឡើងវិញជាបណ្តើរៗហើយ ដោយសេវាកម្មរថភ្លើង មានការកើនឡើងខ្លាំង។

ប្រទេសចិន គឺជាដៃគូពាណិជ្ជកម្មដ៏ធំបំផុត និងជាអ្នកជិតខាងរបស់កូរ៉េខាងជើង។ កាលពីខែមុន គណៈប្រតិភូចិន បានទៅដំណើរទៅទីក្រុងព្យុងយ៉ាង ដើម្បីចូលរួមខួបលើកទី៧០ នៃការបញ្ចប់សង្គ្រាមកូរ៉េ ដែលជាដំណើរទស្សនកិច្ចលើកដំបូងទៅកាន់រដ្ឋឯកោមួយនេះ គិតចាប់តាំងពីមានជំងឺរាតត្បាត។

ជើងហោះហើរ រវាងប្រទេសទាំង២ ត្រូវបានផ្អាក កាលពីដើមឆ្នាំ២០២០ អំឡុងពេលមានជំងឺរាតត្បាតកូវីដ១៩ ខណៈដែលប្រទេសទាំង២ បានបិទព្រំដែនឆ្លងកាត់ទៅកាន់ប្រទេសផ្សេងទៀត។ នៅមុននេះ ក្រុមហ៊ុនអាកាសចរណ៍ Air Koryo និងក្រុមហ៊ុនអាកាសចរណ៍រដ្ឋចិន Air China បានហោះហើរលើផ្លូវហោះហើរ រវាងប្រទេសទាំង២៕