អុីតាលី ៖ សីតុណ្ហភាពឡើងក្ដៅខ្លាំង បានបន្តអូសបន្លាយ ក្នុងទីក្រុង Rome និង Milan របស់ប្រទេសអ៊ីតាលី នៅថ្ងៃចន្ទ (ទី២១ ខែសីហា) នេះ ដោយអ្នកទេសចរ និងអ្នកស្រុក ព្យាយាមរកវិធីកាត់បន្ថយកម្ដៅ ខណៈរលកកម្ដៅថ្មីឈ្មោះ «Nero» បានកើតមាននៅលើឧបទ្វីបនេះ។

យោងតាមគេហទំព័រព្យាករណ៍អាកាសធាតុ iLMeteo.it បានឲ្យដឹងថា រលកកម្ដៅ «Nero» ដែលត្រូវបានដាក់ឈ្មោះតាមអធិរាជ ដែលត្រូវបានចោទប្រកាន់ថា បានចាប់ផ្តើមបង្កចំហេះដ៏ធំក្នុងឆ្នាំ៦៤ នៃគ្រឹស្តសករាជ នៅទីក្រុងរ៉ូមនោះ នឹងនាំឲ្យសីតុណ្ហភាពឡើងក្ដៅដល់ ៣៨អង្សាសេ យ៉ាងហោចណាស់ ៥ថ្ងៃជាប់ៗគ្នាដែរ ក្នុងតំបន់ជាច្រើននៃប្រទេសអ៊ីតាលី ជាមួយនឹងកម្រិតសំណើមខ្ពស់។

ក្រុមអ្នកព្យាករណ៍ បាននិយាយថា ស្ថានភាពក្តៅហួតហែង គួរតែធ្លាក់ចុះបន្តិច នៅចុងសប្តាហ៍ នៅពេលដែលសីតុណ្ហភាព ត្រូវបានគេរំពឹងថា នឹងថមថយកម្ដៅជាមួយនឹងការមកដល់នៃព្យុះផ្គររន្ទះ ដែលមានខ្យល់បក់បោកខ្លាំង។

អ៊ីតាលី គឺជាប្រទេសនាំមុខគេនៃព្រឹត្តិការណ៍អាកាសធាតុក្ដៅខ្លាំង គិតចាប់តាំងពីរលកកម្ដៅ បានវាយប្រហារអឺរ៉ុបភាគខាងត្បូង កាលពីខែមុន ជាមួយនឹងសីតុណ្ហភាពក្តៅខ្លាំង ដែលនាំឲ្យមានការកើនឡើងនូវហានិភ័យនៃការមានអគ្គិភ័យ និងការបាត់បង់ជីវិត៕