ក្នុងឱកាសអញ្ជើញចូលរួមបើកសម័យប្រជុំលើកទី១ នៃរដ្ឋសភា នីតិកាលទី៧ នៅវិមានរដ្ឋសភានាព្រឹកថ្ងៃទី២២សីហា និងក្រោយពីសភាបានដំណើរការចប់សព្វគ្រប់ក្រោមការដឹកនាំដោយសម្តេចពញាចក្រី ហេង សំរិន ព្រឹទ្ធសមាជិក លើដំណើរការបោះឆ្នោតជាកញ្ចប់ផ្តល់សេចក្តីទុកចិត្តដល់ប្រធាន អនុប្រធានរដ្ឋសភា ប្រធាន អនុប្រធានគណៈកម្មការទាំង១០ និងផ្តល់សេចក្តីទុកចិត្តដល់រាជរដ្ឋាភិបាលថ្មី សម្តេចតេជោ ហ៊ុន សែន បានធ្វើនូវសន្និសីទសារព័ត៌មានជាមួយបណ្តាអ្នកសារព័ត៌មានជាតិ និងអន្តរជាតិថា សម្តេច ចង់ឃើញមរតកបន្តគឺអ្នកបន្តវេនបន្តរក្សាសន្តិភាព និងស្ថិរភាពនយោបាយបន្តទៀត។
សម្តេចតេជោ បានបញ្ជាក់ពីមោទនភាពដែលអ្នកនយោបាយជំនាន់មុនបានបន្សល់ជាមរតក សម្រាប់អ្នកជំនាន់ក្រោយបន្ត ជាពិសេសមរតកដែលគិតតាំងពីព្រះបិតា សម្តេចឪ សម្តេចតាដែលបានបន្សល់មរតកនៃការផ្សះផ្សារជាតិ និងមរតកដែលសម្តេចសន្សល់ដល់អ្នកដឹកនាំជំនាន់ក្រោយនៅពេលនេះ គឺសម្តេចចង់ឃើញអ្នកបន្តវេនបានបន្តរក្សាបានល្អនូវសន្តិភាព និងស្ថិរភាពខាងនយោបាយជាបន្តទៀត។
ក្នុងសន្និសីទសារព័ត៌មាននេះសម្តេចក៏បានឆ្លើយនឹងអ្នកសារព័ត៌មានថា ក្រៅពីចង់ឃើញអ្នកបន្តវេនរក្សាសន្តិភាព ស្ថិរភាពនយោបាយឱ្យបានល្អក៏ចង់ឃើញអ្នកបន្តវេនអនុវត្តឱ្យបានជោគជ័យគឺការដឹកនាំប្រទេសចាកចេញពីប្រទេស ដែលមានការអភិវឌ្ឍតិចតួចទៅជាប្រទេសមានប្រាក់ចំណូលកំរិតខ្ពស់ និងជាប្រទេសដែលមានប្រាក់ចំណូលខ្ពស់តែម្តង៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
