ភ្នំពេញ ៖ លោកស្រី លីអាយឡែន តំណាងអង្គការសុខភាពពិភពលោកប្រចាំកម្ពុជា នៅថ្ងៃទី២៥ ខែឧសភា ឆ្នាំ២០២១នេះ បានលើកឡើងថា លោកស្រីនៅតែមានក្ដីព្រួយបារម្ភចំពោះស្ថានភាពជំងឺកូវីដ-១៩នៅកម្ពុជា។ ការព្រួយបារម្ភនេះ ព្រោះតែវត្តមាននូវវីរុសបំប្លែងថ្មី ការមិនលេចចេញនូវរោគសញ្ញាចំពោះអ្នកជំងឺមួយចំនួន និងករណីដែលប្រជាពលរដ្ឋមួយចំនួនចាប់ផ្ដើមធ្វេសប្រហែសជាថ្មីក្នុងការអនុវត្តវិធានការការពារ។
ក្នុងឱកាសចុះត្រួតពិនិត្យដំណើរការចាក់វ៉ាក់សាំងកូវីដ-១៩ ជាមួយក្រសួងសុខាភិបាល និងUNICEF នៅទីតាំង ទីលានកីឡាបុរីប៉េងហួតបឹងស្នោ ក្នុងខណ្ឌច្បារអំពៅនាព្រឹកនេះ លោកស្រី លី អៃលែន តំណាងអង្គការសុខភាពពិភពលោកនៅកម្ពុជា លើកឡើងថា លោកស្រីនៅតែមានការព្រួយបារម្ភចំពោះស្ថានភាពជំងឺកូវីដ-១៩ នៅកម្ពុជា។ ការព្រួយបារម្ភនេះ ដោយសារលោកស្រីមើលឃើញពីវត្តមាន នៃវីរុសបំប្លែងថ្មីនៅកម្ពុជា ក៏ដូចជា ការមិនលេចឡើងនូវរោគសញ្ញារបស់ករណីវិជ្ជមានមួយចំនួន និងការចាប់ផ្ដើមធ្វេសប្រហែសជាថ្មីរបស់ប្រជាពលរដ្ឋកម្ពុជា ទោះបីជាពេលនេះ មានកំណើននៃការពាក់ម៉ាស និងការលាងសម្អាតដៃយ៉ាងណាក្ដី តែការជួបជុំប្រមូលផ្ដុំពុំទាន់អនុវត្តបានល្អប្រសើរនោះទេ។
ទន្ទឹមការព្រួយបារម្ភពីស្ថានភាពនៃជំងឺកូវីដ-១៩ នេះ លោកស្រីតំណាងអង្គការសុខភាពពិភពលោកនៅកម្ពុជា ក៏បានបញ្ជាក់ឱ្យប្រជាពលរដ្ឋកម្ពុជា នៅបន្តការប្រុងប្រយ័ត្ន បន្តអនុវត្តវិធានការ ៣ការពារ ៣កុំ ឱ្យបានខ្ជាប់ខ្ជួន ជាដាច់ខាត ទោះបីទទួលបានការចាក់វ៉ាក់សាំងការពាររួចរាល់យ៉ាងណាក្ដី។ ហើយលោកស្រីក៏អំពាវនាវ ឱ្យគ្រប់អាជីវកម្មត្រូវតែរៀបចំឱ្យមានវិធានការការពាររួចជាស្រេច ក្នុងការបើកដំណើរការជាថ្មី ដើម្បីបញ្ចៀសការបិទខ្ទប់ជាថ្មី។ លោកស្រី សង្កត់ធ្ងន់ថា បើសិនជាខ្វះការចូលរួមរបស់ប្រជាពលរដ្ឋគ្រប់រូបនោះ ករណីឆ្លងនិងស្លាប់ក្នុងរយៈពេល ២សប្ដាហ៍ រឺមួយខែខាងមុខ នឹងមានការកើនឡើងកាន់តែច្រើន។
ក្នុងដំណាក់កាលបច្ចុប្បន្ននេះ លោកស្រី លី អាយឡែន ក៏សម្ដែងការសប្បាយចិត្តចំពោះយុទ្ធនាការចាក់វ៉ាក់សាំងរបស់កម្ពុជា ដែលមានដំណើរការលឿនល្អប្រសើរ ខណៈពេលដែលប្រទេសដទៃទៀតហាក់មានភាពយឺតយ៉ាវលើការងារនេះ។ លោកស្រីថា ការចាក់វ៉ាក់សាំងជាឧបករណ៍ការពារ ដើម្បីកាត់បន្ថយការឈឺធ្ងន់ធ្ងរ និងកាត់បន្ថយការចូលទៅសម្រាកនៅមន្ទីរពេទ្យ។ គិតត្រឹមថ្ងៃទី ២៣ឧសភា ប្រជាពលរដ្ឋកម្ពុជាចំនួន ២ ២៦៩ ៨៦០ បានចាក់វ៉ាក់សាំងរួចរាល់។ ចំនួននេះគឺស្មើនឹង ២២,៧០% នៃចំនួនគោលដៅចាក់វ៉ាក់សាំង ១០លាននាក់៕
អត្ថបទ៖ គឹមហុក
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
