ប្រធានាធិបតីម៉ិកស៊ិកលោក Andrés Manuel López Obrador កាលពីថ្ងៃចន្ទ (ទី២១ ខែសីហា) បានវាយប្រហារជាសាធារណៈទៅលើរបាយការណ៍របស់ទីភ្នាក់ងារសារព័ត៌មាន Reuters ដែលបានចេញផ្សាយ កាលពីសប្តាហ៍មុន ដោយរៀបរាប់លម្អិតអំពីរបៀបដែលក្រុមឧក្រិដ្ឋកម្ម បានរៀបចំក្លែងបន្លំប្រាក់ចំណេញពីការជូញដូរគ្រឿងញៀនឲ្យទៅជាប្រាក់ចរាចរជាប្រក្រតី ដើម្បីផ្ទេរប្រាក់នោះពីសហរដ្ឋអាមេរិកទៅម៉ិកស៊ិក។

រឿងរ៉ាវដែលបានចេញផ្សាយកាលពីថ្ងៃសុក្រសប្ដាហ៍កន្លងមកនោះ គឺផ្អែកលើបទសម្ភាសជាមួយអ្នកស្រុកម៉ិកស៊ិកជាង ២០នាក់ ដែលបាននិយាយថា ពួកគេទទួលបានការបង់ពីក្រុម Sinaloa Cartel ដើម្បីទទួលយកប្រាក់ដែលផ្ញើដោយប្រតិបត្តិកររបស់ក្រុម នៅសហរដ្ឋអាមេរិក បន្ទាប់មកបង្វែរប្រាក់ពីគ្រឿងញៀននោះបន្តទៅឲ្យសមាជិកក្រុមជួញដូរ ក្នុងប្រទេសម៉ិកស៊ិក។

របាយការណ៍របស់សារព័ត៌មាន Reuters នោះ ក៏បានទាញយកសំណៅនៃសំណុំរឿងរបស់តុលាការសហព័ន្ធអាមេរិកចំនួន ៨ករណី និងការសម្ភាសជាមួយប្រភពរាប់សិប រួមទាំងអ្នកនៅខាងក្នុងឧស្សាហកម្មនេះ អ្នកវិភាគ និងភ្នាក់ងារអនុវត្តច្បាប់ នៅព្រំដែនទាំងខាង ដើម្បីបង្កើតបានជារូបភាពលម្អិតថា តើការងារប្រថុយប្រថានរបស់ក្រុមឧក្រិដ្ឋជនទាំងនោះប្រព្រឹត្តទៅយ៉ាងដូចម្ដេច។

តែយ៉ាងណាក្ដី អំឡុងសន្និសីទសារព័ត៌មានជាប្រចាំរបស់លោក ដែលតែងធ្វើឡើងរៀងរាល់ព្រឹកថ្ងៃធ្វើការ លោក López Obrador បានថ្លែងថា៖ «ពួកអ្នកសារព័ត៌មាន Reuters ខ្លះ ជាអ្នកបោកប្រាស់ ពោលគឺជាអ្នកនិយាយភូតកុហក»។ ពាក់ព័ន្ធនឹងការលើកឡើងពីសំណាក់ប្រធានាធិបតីម៉ិកស៊ិកនេះ អ្នកនាំពាក្យរបស់សារព័ត៌មាន Reuters បាននិយាយថា៖ «យើងគាំទ្រចំពោះសេចក្ដីរាយការណ៍របស់យើង»។

លោក López Obrador បានបន្ថែមថា អត្ថបទរបស់ Reuters បានលើកឡើងថា «ការផ្ទេរប្រាក់ភាគច្រើនមានទំនាក់ទំនងជាមួយនឹងការជូញដូរគ្រឿងញៀន»។ តែបើយោងតាមមន្ត្រីសហរដ្ឋអាមេរិក ដែលធ្វើការពាក់ព័ន្ធនឹងហិរញ្ញវត្ថុខុសច្បាប់ និងរបាយការណ៍ខែមីនារបស់វិទ្យាស្ថានស្រាវជ្រាវម៉ិកស៊ិក Signos Vitales ដែលបាននិយាយយោងទៅរឿងនេះ បានឲ្យដឹងថា តាមពិត ទីភ្នាក់ងារព័ត៌មាន បានរាយការណ៍ថា ចន្លោះពី ៧,៥ ទៅ ១០ភាគរយនៃការផ្ទេរប្រាក់ទាំងអស់ អាចបានមកពីសកម្មភាពខុសច្បាប់៕