ម្ចាស់ភោជនីយដ្ឋានជប៉ុន ក្នុងទីក្រុងហុងកុង កំពុងរកមធ្យោបាយដោះស្រាយនឹងបម្រាមលើការនាំចូលអាហារសមុទ្រពីខេត្តចំនួន១០ របស់ប្រទេសជប៉ុន ដោយបម្រាមដែលជិតកើតឡើងនេះ ត្រូវបានដាក់ចេញដោយសារតែផែនការរបស់ទីក្រុងតូក្យូ ក្នុងការបញ្ចេញទឹកដែលបានធ្វើប្រព្រឹត្តិកម្មរួចចេញពីរោងចក្រមិនដំណើរការហ្វូគូស៊ីម៉ា (Fukushima) ចូលទៅក្នុងសមុទ្រ ចាប់ពីថ្ងៃទី២៤ ខែសីហាតទៅ។

ទីក្រុងហុងកុង គឺជាទីផ្សារធំទី២ របស់ជប៉ុន បន្ទាប់ពីចិនដីគោក សម្រាប់ការនាំចេញកសិផល និងផលិតផលនេសាទ។ លោក Halry Yu អាយុ ៤២ឆ្នាំ ដែលជាម្ចាស់ភោជនីយដ្ឋានជប៉ុន Hassun បាននិយាយថា៖ «ជាង ៩០ភាគរយនៃអាហារសមុទ្រ ដែលត្រូវបាននាំមកហុងកុង ត្រូវបានប្រមូលផ្តុំនៅទីក្រុងតូក្យូ។ ប្រសិនបើរដ្ឋាភិបាលហាមឃាត់ការនាំចូលដែលឆ្លងកាត់ក្រុងតូក្យូនោះ ខ្ញុំគិតថា ភោជនីយដ្ឋានស៊ូស៊ីទាំងអស់ ក្នុងទីក្រុងហុងកុង នឹងជួបបញ្ហា។ មានគ្រឿងសមុទ្រខ្លះ នាំចូលពីក្រុងអូសាកា ប៉ុន្តែត្រូវបានកំណត់ច្រើនប្រភេទ»។

លោក Yu រំពឹងថា នឹងខាតបង់ចំណូលរហូតដល់ ៤០ភាគរយ សម្រាប់ភោជនីយដ្ឋានរបស់លោក ក្រោយមានការហាមឃាត់នេះ ហើយបានប្រាប់ថា លោកនឹងព្យាយាមរកវិធីសង្គ្រោះអាជីវកម្ម ដោយបន្ថែមសាច់ទៅក្នុងបញ្ជីមុខម្ហូបរបស់ខ្លួន។

ប្រទេសជប៉ុនបានស្នើឲ្យមន្ត្រីក្រុងហុងកុងកុំរឹតបន្តឹងការនាំចូលអាហារនេះ។ បើយោងតាមស្ថិតិរបស់រដ្ឋាភិបាល បានឲ្យដឹងថា ក្នុងឆ្នាំ២០២២ ជប៉ុនបាននាំចេញផលិតផលនេសាទក្នុងរង្វង់ទឹកប្រាក់ចំនួន ៧៥,៥ពាន់លានយ៉េន (៥៣៦លានដុល្លារ) ទៅកាន់ហុងកុង៕