អគ្គលេខាធិការអង្គការសហប្រជាជាតិលោក Antonio Guterres កាលពីថ្ងៃចន្ទ (ទី២២ ខែសីហា) បានអំពាវនាវដល់សហគមន៍អន្តរជាតិឲ្យគាំទ្រជនរងគ្រោះ និងអ្នករស់រានមានជីវិតពីអំពើភេរវកម្ម ហើយប្រើប្រាស់បទពិសោធន៍របស់ពួកគេ ដើម្បីបង្កើតការផ្លាស់ប្តូរ សម្រាប់អនាគតដ៏ល្អប្រសើរ។

លោក Guterres បានធ្វើការអំពាវនាវក្នុងសារមួយ ដើម្បីប្រារព្ធទិវាអន្តរជាតិនៃការចងចាំ និងការគោរព ចំពោះជនរងគ្រោះនៃអំពើភេរវកម្ម ដែលត្រូវនឹងថ្ងៃទី២១ ខែសីហា ដោយប្រធានបទនៃទិវាអន្តរជាតិឆ្នាំនេះ គឺ «កេរដំណែល ដែលជាការស្វែងរកក្តីសង្ឃឹម និងការកសាងអនាគតប្រកបដោយសន្តិភាព។

លោក Guterres បាននិយាយថា៖ «នៅថ្ងៃនេះ យើងសូមគោរពដល់អស់អ្នកដែលបាត់បង់ ឬរងគ្រោះដោយសារការវាយប្រហារភេរវកម្ម នៅជុំវិញពិភពលោក។ យើងសូមថ្លែងអំណរគុណចំពោះការងារដ៏អស្ចារ្យរបស់ជនរងគ្រោះ និងអ្នករស់រានមានជីវិត ដែលបានសម្រេចចិត្តប្រើប្រាស់បទពិសោធន៍របស់ពួកគេ ដើម្បីនាំមកនូវការផ្លាស់ប្តូរ»។

មហាសន្និបាតអង្គការសហប្រជាជាតិ ក្នុងឆ្នាំ២០១៧ បានកំណត់យកថ្ងៃទី២១ ខែសីហា ជាទិវាអន្តរជាតិនៃការចងចាំ និងគោរពដល់ជនរងគ្រោះនៃអំពើភេរវកម្ម។ នេះគឺជាទិវា ដែលផ្ដល់កិត្តិយស ចងចាំ និងគោរពវិញ្ញាណក្ខន្ធជនរងគ្រោះ និងអ្នករួចជីវិតពីអំពើភេរវកម្មទូទាំងពិភពលោក ដោយបង្ហាញពីសារៈសំខាន់នៃសាមគ្គីភាពសកល និងធានាថា រឿងរ៉ាវ និងបទពិសោធន៍របស់ពួកគេមិនត្រូវបានបំភ្លេចចោលនោះឡើយ៕