ភ្នំពេញ ៖ ឯកឧត្តម សាស្រ្តាចារ្យ ញឹប អង្គាបុស្ស នាយកមនី្ទរពេទ្យកុមារជាតិ ក្នុងកិច្ចសម្ភាសន៍ជាមួយBTV ព័ត៌មាន នាព្រឹកថ្ងៃទី២២ ខែសីហា ឆ្នាំ២០២៣នេះថា សម្រាប់អាណតិ្តទី៧នេះ មនី្ទរពេទ្យកុមារជាតិ និងទទួលបានសមិទ្ធផលអគារមនី្ទរពេទ្យថ្មី ចំនួន២បន្ថែមទៀត ដែលគ្រោងសាងសង់នៅដើមឆ្នាំ២០២៤ និងដើមឆ្នាំ២០២៥ខាងមុខនេះ។

​ឯកឧត្តម សាស្រ្តាចារ្យ ញឹប អង្គាបុស្ស បានបន្តថា អគារមនី្ទរពេទ្យថ្មីចំនួន២បន្ថែមនេះ គឺទី១ សាធារណរដ្ឋកូរ៉េ (កូរ៉េខាងត្បូង) ផ្តល់ជំនួយសាងសង់អគារមនី្ទរពេទ្យថ្មី តាមរយៈទីភ្នាក់ងារសហប្រតិបតិ្តការអន្តរជាតិកូរ៉េ (ហៅកាត់ថា កយកា-KOICA) បានអនុម័តរួចរាល់ហើយ ដែលមានកញ្ចប់ថវិកាចំនួន១៦លានដុល្លារសហរដ្ឋអាមេរិក (សម្រាប់សាងសង់ បណ្តុះបណ្តាល និងបំពាក់ឧបករណ៍វេជ្ជសាស្រ្ត) ហើយគម្រោងនេះ កំពុងតែដំណើរការ ដែលត្រូវការអ្នកដឹកនាំគម្រោង និងគូសប្លង់ជាដើម ដែលមានកម្ពស់៥ជាន់ ដាក់អ្នកជំងឺបានចំនួន១៦០គ្រែ អគារមនី្ទរពេទ្យថ្មីនេះ គ្រោងសាងសង់រួចរាល់ និងដាក់ឲ្យប្រើប្រាស់ នាឆ្នាំ២០២៧ និងទី២ អគារមនី្ទរពេទ្យថ្មី ផ្នែកវៈកាត់ ដោយធ្វើការជួសជុល និងពង្រីកបន្ថែម ដែលមានកម្ពស់៣ជាន់ ដាក់អ្នកជំងឺបានចំនួន១០០គ្រែ។

ឯកឧត្តមនាយកមនី្ទរពេទ្យកុមារជាតិ បានបញ្ជាក់ទៀតថា ៧ខែដើមឆ្នាំ២០២៣ មនី្ទរពេទ្យកុមាជាតិបានទទួលអ្នកជំងឺ ចូលមកសម្រាកព្យាបាលក្នុងមនី្ទរពេទ្យ មានចំនួនជាង១ម៉ឺននាក់ និងអ្នកមកពិគ្រោះ ពិនិត្យជំងឺ មានចំនួនជាង២០ម៉ឺននាក់ បើប្រៀបធៀបទៅនឹងឆ្នាំ២០២២ គឺអ្នកមកទទួលសេវាកម្ម មានការកើនឡើងច្រើន ប្រមាណជា៣០% ទៅ៤០%៕ ​ អត្ថបទ រដ្ឋា