នៅថ្ងៃអង្គារនេះ ប្រជាពលរដ្ឋជប៉ុនរស់នៅក្នុងទីក្រុងតូក្យូ និយាយថា ពួកគេនៅតែព្រួយបារម្ភ រយៈពេល ១ថ្ងៃមុនពេលរដ្ឋាភិបាលបញ្ចេញទឹកបន្សាបវិទ្យុសកម្មពីរោងចក្រនុយក្លេអ៊ែរ Fukushimaចូលទៅក្នុងមហាសមុទ្រ ។ 

 ទឹកបន្សាបវិទ្យុសកម្មជាង ១លានម៉ែត្រគូប នឹងត្រូវបញ្ចេញនៅថ្ងៃព្រហស្បតិ៍ស្អែកនេះ ពីរោងចក្រដែលប្រតិបត្តិការដោយក្រុមហ៊ុនអគ្គិសនីក្រុងតូក្យូ Tepco គឺជារោងចក្រមួយដែលរងការរិះគន់យ៉ាងខ្លាំងពីចិន និងក្រុមប្រជានេសាទក្នុងស្រុក ដែលមានការព្រួបារម្ភថាវានឹងប៉ះពាល់ដល់ការរស់នៅប្រចាំថ្ងៃរបស់ពួកគេ ។ 

 ទោះបីជាយ៉ាងណាក៏ដោយ រដ្ឋាភិបាលជប៉ុននិយាយថា ការបញ្ចេញទឹកកាកសំណល់នុយក្លេអ៊ែរនេះ គឺមានសុវត្ថិភាព ។ 

 ទីភ្នាក់ងារថាមពលអាតូមិកអន្តរជាតិ (IAEA) ដែលជាក្រុមឃ្លាំមើលនុយក្លេអ៊ែររបស់អង្គការសហប្រជាជាតិ បានបើកភ្លើងខៀវផែនការមួយនេះកាលពីកក្កដា ដោយពួកគេនិយយាថា វាឈានដល់កម្រិតស្តង់ដាអន្តរជាតិ ហើយផលប៉ះពាល់ដែលវាមានចំពោះមនុស្ស និងបរិស្ថាន មានតិចតួចប៉ុណ្ណោះ ។ 

 ដោយឡែក ភ្ញៀវទេសចរដែលមកកម្សាន្តលេងនៅក្នុងប្រទេសជប៉ុន ពុំមានក្តីកង្វល់នោះទេ ។ 

 លោក Brett Rallings ដែលជាភ្ញៀវទេសចរវ័យ ៥៤ឆ្នាំមួយរូបមកពីប្រទេសអូស្រ្តាលី និយាយថា បើសិនជាក្រុមអ្នកវិទ្យាសាស្រ្តនិយាយថាមិនអី វាប្រហែលជាគ្មានបញ្ហានោះទេ ។ 

 លោកបន្តថា ពួកយើងមិនមែនរស់នៅក្នុងពិភពលោកដ៏ល្អឥតខ្ចោះនោះទេ ពួកយើងបំពុលវាគ្រប់ពេល ។ ពួកយើងរំពឹងថាព្រះម៉ែធម្មជាតិ នឹងជួយដោះស្រាយបញ្ហាមួយនេះ ៕