កាលពីថ្ងៃអង្គារម្សិលមិញ ប្រជាពលរដ្ឋអេស្ប៉ាញ បានទទួលរងឥទ្ធិពលពីរលកកម្តៅទី ៤នៅក្នុងរដូវក្តៅនេះ ពេលដែលសីតុណ្ហភាពកើនឡើងដល់ ៤០អង្សាសេនៅតាមតំបន់មួយចំនួន ។ 

 នៅទីក្រុងភាគខាងត្បូង Seville ប្រជាពលរដ្ឋក្នុងស្រុក បានព្យាយាមងូតទឹកឲ្យសេះដឹកភ្ញៀវ ដើម្បីធ្វើឲ្យវាត្រជាក់ ខណៈដែលភ្ញៀវទេសចរ ស្វែងរកម្លប់ការពារកម្តៅថ្ងៃដ៏ក្តៅដូចភ្លើងនេះ ។ ស្រ្តីម្នាក់និយាយថា ឥឡូវគាត់ជឿថា បម្រែមប្រួលអកាសធាតុបានក្លាយជាការពិតហើយ ។ 

 អ្នកស្រី Mati Perezគឺជាជាងកែសម្ផស្សវ័យ ៤៦ឆ្នាំ និយាយថា ខ្ញុំមិនជឿថា បម្រែមប្រួលអាកាសធាតុប្រែក្លាយជាការពិតបែបហ្នឹងនោះទេ ប៉ុន្តែឥឡូវខ្ញុំគិតថា រាល់រដូវក្តៅ ខ្ញុំមើលឃើញថាសីតុណ្ហភាពកើនឡើងខ្ពស់ជាងមុន រាល់រដូវក្តៅ ខ្ញុំមើលឃើញថា វាកាន់តែងាយរងគ្រោះជាងមុន ។

អ្នកស្រីបន្តថា កាលគាត់នៅក្មេង រលកកម្តៅមានសីតុណ្ហភាពតែ ៣៥អង្សាសេប៉ុណ្ណោះ ហើយឥឡូវរលកកម្តៅមានសីតុណ្ហភាពកើនឡើងរហូតដល់៤៨អង្សាសេ វាពិតជាក្តៅខ្លាំងណាស់ ។ 

ទីភ្នាក់ងារឧតុនិយមអេស្ប៉ាញ(AEMET) រំពឹងថា រលកកម្តៅនេះនឹងអូសបន្លាយពេលដល់ថ្ងៃព្រហស្បតិ៍ ក្នុងនោះតំបន់ភាគឦសាន តំបន់ភាគខាងត្បូង និងតំបន់ភាគកណ្តាល នឹងជួបសីតុណ្ហភាពខ្ពស់ បើទោះបីជានៅពេលយប់ ។ 

 ក្រុមអាជ្ញាធរនិយាយថា តំបន់ភាគច្រើននៅទូទាំងប្រទេស ស្ថិតក្នុងសីតុណ្ហភាពខ្ពស់បំផុត ឬប្រឈមខ្លាំងនឹងករណីភ្លើងឆេះព្រៃ ៕