អាមេរិក ៖ កាលពីថ្ងៃអង្គារថា ក្រសួងមហាផ្ទៃសហរដ្ឋអាមេរិក បានអនុម័តការសាងសង់កសិដ្ឋានថាមពលខ្យល់កម្លាំង ៧០៤មេហ្គាវ៉ាត់ នៅជិតតំបន់ឆ្នេរកោះ Rhodeដែលជាគម្រោងថាមពលខ្យល់ជិតឆ្នេរសមុទ្រទី ៤ ដែលទីភ្នាក់ងារថាមពលអាមេរិកមានថាមពលបៃតងមួយនេះ ស្របពេលដែលរដ្ឋបាលរបស់លោកប្រធានាធិបតី Joe Bidenចង់សម្រេចគោលដៅនាំយកថាមពលខ្យល់នៅក្បែរមាត់សមុទ្រ ៣០ជីហ្គាវ៉ាត់ នៅឆ្នាំ ២០៣០ ។ 

 ក្រសួងមហាផ្ទៃអាមេរិកនិយាយថា គម្រោងបដិវត្តន៍ខ្យល់នៅជិតតំបន់ឆ្នេរ Point Judith កោះ Rhodeអាចផ្តល់ថាមពលដល់ផ្ទះប្រជាពលរដ្ឋជិត ២៥ម៉ឺនខ្នង ហើយនិងបង្កើតការងារក្នុងស្រុក ១.២០០កន្លែង អំឡុងដំណាក់កាលសាងសង់ ។ 

 គ្រប់គ្រងដោយក្រុមហ៊ុនអភិវឌ្ឍន៍ថាមពលខ្យល់ Orsted and Eversource គម្រោងមួយនេះ នឹងរួមបញ្ចូលទីតាំងរហូតដល់ ៩៧កន្លែង សម្រាប់ការដំឡើងក្បាលទួរប៊ីនខ្យល់ ៦៥គ្រឿង និងអនុស្ថានីយ៍ក្បែរឆ្នេរ ២កន្លែង ។ 

 លោក Ali Zaidi គឺជាទីប្រឹក្សាអាកាសធាតុជាតិអាមេរិក និយាយថា ការអនុម័តនៅថ្ងៃនេះសម្រាប់គម្រោងថាមពលខ្យល់ជិតឆ្នេរទី ៤ គឺជាព្រឹត្តការណ៍ធំទទួលបានការអនុញ្ញាតចុងក្រោយគេរបស់ពួកយើង ដែលនឹងជួយពង្រឹងសន្តិសុខថាមពលអាមេរិក ធ្វើឲ្យបណ្តាញថាមពលរបស់យើងកាន់តែគួរឲ្យទុកចិត្ត តម្លៃថាមពេលកាន់តែថោកជាងមុន ហើយនិងកាត់បន្ថយការបំពុលបរិយាកាសដ៏គ្រោះថ្នាក់ ។ 

 សូមបញ្ជាក់ថា កាលពីមុនរដ្ឋបាលរបស់លោក Bidenបានអនុម័តគម្រោង Vineyard Windនៅជិតតំបន់ឆ្នេររដ្ឋ Massachusetts គម្រោង South Fork Wind នៅជិតកោះ Rhode និងរដ្ឋ New York ហើយនិងគម្រោង Ocean Wind 1 នៅជិតតំបន់ឆ្នេររដ្ឋ New Jersey ៕