អេស្ប់ាញ់ ៖ យោងតាមប្រធានសភាជាន់ទាប លោកស្រី Francina Armengol បានឲ្យដឹងថា ព្រះមហាក្សត្រ Felipe របស់ប្រទេសអេស្ប៉ាញ កាលពីថ្ងៃអង្គារ បានតែងតាំងមេដឹកនាំរបស់គណបក្សជាជនអភិរក្សនិយម People's Party (PP) លោក Alberto Nunez Feijoo ដើម្បីទៅប្រឈមនឹងការបោះឆ្នោតរបស់សភា សម្រាប់តំណែងនាយករដ្ឋមន្ត្រី។

ព្រះមហាក្សត្រដែលជាប្រមុខរដ្ឋ ទ្រង់បានសម្រេចព្រះទ័យបែបនេះ បន្ទាប់ពីបានពិគ្រោះជាមួយតំណាងនៃគណបក្សនានា ដែលទទួលបានអាសនៈសភា ក្នុងការបោះឆ្នោតដែលនៅរកមិនទាន់ឃើញដំណោះស្រាយ កាលពីថ្ងៃទី២៣ ខែកក្កដា ដើម្បីបានដឹងពីបុគ្គល ដែលពួកគេនឹងផ្ដល់សំឡេងគាំទ្រ នៅក្នុងការបោះឆ្នោតតែងតាំងនេះ។

ខណៈដែលរូបលោកបានថ្លែងអំណរគុណដល់ព្រះមហាក្សត្រ សម្រាប់ការត្រាស់បង្គាប់នេះ លោក Feijoo បានបង្ហោះនៅលើវេទិកាផ្ញើសាររបស់បណ្ដាញសង្គម X ដែលពីមុនគេស្គាល់ថា Twitter ថា៖ «យើងនឹងផ្តល់សំឡេងដល់ពលរដ្ឋជាង ១១លាននាក់ ដែលចង់បានការផ្លាស់ប្តូរ ស្ថិរភាព និងការសម្របសម្រួលជាមួយរដ្ឋាភិបាល ដែលការពារសមភាពរបស់ជនជាតិអេស្ប៉ាញទាំងអស់»។

សុំបញ្ជាក់ថា គ្មានគណបក្ស ឬក្រុមណាមួយ ទទួលបានអាសនៈភាគច្រើនដាច់ខាតនោះឡើយ ក្នុងការបោះឆ្នោតសកល មុនអាណត្តិនេះ។ គណបក្ស PP របស់លោក Feijoo បានឈ្នះអាសនៈច្រើនជាងគេ គឺចំនួន ១៣៧អាសនៈ ហើយរហូតមកទល់នឹងពេលនេះ មានការគាំទ្រពីសមាជិកសភាចំនួន ៣៥នាក់ផ្សេងទៀត ក្នុងនោះរួមទាំងសំឡេងមកពីគណបក្សស្ដាំនិយម Vox ផងដែរ សម្រាប់ការគាំទ្រសរុបចំនួន ១៧២សំឡេង។ 

លោក Feijoo នឹងត្រូវការការគាំទ្រពីសមាជិកសភាចំនួន ១៧៦នាក់ ក្នុងចំណោមសមាជិកសភាចំនួន ៣៥០នាក់របស់សភាជាន់ទាប ដើម្បីទទួលបានតំណែងនាយករដ្ឋមន្ត្រី ឬបើបរាជ័យនោះ សំឡេងគាំទ្រភាគច្រើនដាច់ខាតត្រូវចូលដល់ការបោះឆ្នោតលើកទី២។ ប្រសិនបើរូបលោកមិនទទួលបានជោគជ័យទៀតនោះ ព្រះមហាក្សត្រត្រូវជ្រើសរើសបេក្ខភាពថ្មី៕