រុស្ស៊ី ៖ ប្រព័ន្ធផ្សព្វផ្សាយ ក្នុងស្រុក បានរាយការណ៍ថា សមាជិក ៨នាក់នៃក្រុមទេសចរ ដែលកំពុងរុករកផ្លូវរូងក្រោមដីក ក្នុងប្រព័ន្ធលូបង្ហូរទឹក នៅទីក្រុងម៉ូស្គូ កាលពីថ្ងៃអាទិត្យ (ទី២០ ខែសីហា) ត្រូវបានគេរកឃើញស្លាប់ បន្ទាប់ពីមិនបានត្រៀមខ្លួន និងភ័យស្លន់ស្លោ ពេលមានទឹកជំនន់យ៉ាងគំហុកភ្លាមៗ។

ជនរងគ្រោះដែលកំពុងធ្វើដំណើរមើលទន្លេក្រោមដី ដែលគេស្គាល់ថា Neglinka ត្រូវបានគេជឿថា បានជាប់នៅក្នុងនោះ ដោយសារកម្រិតទឹក ដែលឡើងខ្លាំង បន្ទាប់ពីមានភ្លៀងធ្លាក់យ៉ាងជោគជាំ ហើយមិនអាចគេចឡើងមកខាងក្រៅបាន។

ប្រព័ន្ធផ្សព្វផ្សាយក្នុងស្រុក បានឲ្យដឹងថា ក្នុងចំណោមអ្នកដែលលង់ទឹកស្លាប់នោះ មានមគ្គុទ្ទេសក៍ទេសចរណ៍ម្នាក់ និងសមាជិកក្រុមដំណើរកម្សាន្តចំនួន ៧នាក់ ក្នុងនោះរួមមានទាំងអនីតិជនផងដែរ។

ក្រុមអ្នកស៊ើបអង្កេត បាននិយាយថា «សាកសពរបស់អ្នកចូលរួមដំណើរកម្សាន្តទាំងអស់ ត្រូវបានរកឃើញ» ហើយ ដោយបន្ថែមថា ការកំណត់អត្តសញ្ញាណជនរងគ្រោះជាផ្លូវការ កំពុងដំណើរការ។

អភិបាលក្រុងម៉ូស្គូលោក Sergei Sobyanin បានហៅឧបទ្ទវហេតុនេះថា ជា «សោកនាដកម្មដ៏គួរឲ្យរន្ធត់» នៅលើបណ្ដាញសង្គម ហើយបានសម្តែងការចូលរួមរំលែកទុក្ខរបស់លោកជាមួយក្រុមគ្រួសារនៃជនរងគ្រោះ៕