ភ្នំពេញ៖ ក្រោយចូលកាន់តំណែងជារដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបាន១ថ្ងៃភ្លាម ឯកឧត្ដម ហេង សួរ បានចុះសួរសុខសទុក្ខ និងហូបអាហារថ្ងៃត្រង់ជាមួយកម្មករដោយឥតព្រាងទុកនៅរោងចក្រម៉េងដាហ្វូតវៀ។ រោងចក្រដែលមានទីតាំងនៅតាមផ្លូវវ៉េងស្រេងក្នុងសង្កាត់ចោមនេះ មានកម្មករចំនួនជិត៣០០០នាក់ដែលកម្មករមានផ្ទៃពោះចំនួន ១៦០នាក់ និងជនដែលមានពិការភាពចំនួន ៤៣នាក់ ហើយក្នុងនោះ មានសហជីពមូលដ្ឋានជាង២០។ 

ក្នុងជំនួបឥតព្រាងទុកនៅថ្ងៃនេះ ឯកឧត្ដម ហេង សួរ តាមរយៈឡេក្រាមផ្លូវការ បានសុំទោសដល់កម្មករដែលឯកឧត្ដមបានចុះទៅដោយមិនបានប្រាប់មុន។ ក្រោយទទួលទានអាហារ និងដើរទស្សនកិច្ចមួយជុំហើយ ឯកឧត្ដមរដ្ឋមន្ត្រី ក៏បានសរសើរពីរសជាតិម្ហូបនៅរោងចក្រម៉េងដាថា ឆ្ងាញ់ និងមានអនាម័យល្អ អាចទទួលយកបានជាគំរូមួយ។

ទន្ទឹមនិងនោះរដ្ឋមន្ត្រីក្រសួងការងារថ្មីរូបនេះ ក៏មិនភ្លេចពីរំលឹកពីជំនួបផ្លូវការរវាងកម្មករ រដ្ឋបាល ប្រធានផ្នែក នៃរោងចក្រនេះ ដែលបានជួបជាមួយសម្តេចតេជោ ហ៊ុន សែន កាលពីឆ្នាំ២០១៨ និងជំនួបជាមួយ​ឯកឧត្ដមកិត្តិទេសាភិបាលបណ្ឌិត​ ហ៊ុន ម៉ាណែត កាលពីខែឧសភា ឆ្នាំ២០២៣នេះផងដែរ។ 

បើតាមលោកហេង សួរ កម្មករទាំងអស់បាននឹករឭកដល់សម្តេចតេជោ ហ៊ុន សែន ហើយចងចាំជានិច្ចនូវរូបភាពដ៏ស្និទ្ធស្នាល និងកក់ក្ដៅ ដែលសម្តេចបានចុះជួបបងប្អូនកម្មករនាពេលកន្លងទៅ។

រដ្ឋមន្ត្រីរូបនេះក៏បញ្ជាក់ពីគោលបំណងរបស់កម្មករដែលចង់ជួបឯកឧត្ដមកិត្តិទេសាភិបាលបណ្ឌិត ហ៊ុន ម៉ាណែត ក្នុងនាមជានាយករដ្ឋមន្ត្រីនាពេលដ៏ខ្លីខាងមុខនេះដែរ។ 

ក្នុងពិធីជួបក្រៅផ្លូវការនោះ កម្មការិនីរោងចក្រ ម៉េង ដា ដែលបានចូលរួមហូបបាយជាមួយដែរនោះ លោកស្រី គល់ យ៉ា បានបង្ហាញពីក្តីរំភើបព្រោះថាវត្តមានរបស់មន្ត្រីជាន់ខ្ពស់មកជួបជាមួយកម្មករ។ លោកស្រីថា នេះគឺជាការបង្ហាញពីការយកចិត្តទុកដាក់យ៉ាងខ្លាំងដល់កម្មករព្រោះថាមិន ងាយមានឥស្សរជនមកហូបបាយ និងសួរសុខទុក្ខផ្ទាល់ដល់រោងចក្រនោះទេ។ 

យ៉ាងណាក៏ដោយក្រោយចុះជួបស្ងាត់ៗនេះ ឯកឧត្ដមហេង សួរដែលទើបចូលកាន់តំណែងថ្មី បានណែនាំឱ្យទាំងមន្ត្រីរាជការគ្រប់ជាន់ថ្នាក់ និងអ្នកគ្រប់គ្រងរោងចក្រនីមួយៗ ត្រូវចុះមកជួប និងហូបបាយជាមួយកម្មករឱ្យបានញឹកញាប់ដើម្បីសាករសជាតិម្ហូប លក្ខខណ្ឌអនាម័យ និងរកវិធីសាស្ត្រកែលម្អឱ្យកាន់តែប្រសើរ ឬយកធ្វើជាគំរូទៅកន្លែងផ្សេង៕