នៅថ្ងៃពុធនេះ រដ្ឋមន្រ្តីការបរទេសអាល្លឺម៉ង់លោកស្រី Annalena Behrbockបាននិយាយការពារដល់ការវាយប្រហារយានដ្រូនរបស់អ៊ុយក្រែនលើរដ្ឋធានីម៉ូស្គូរបស់រុស្ស៊ី ដោយលោកស្រីអះអាងថា វាស្របតាមច្បាប់អន្តរជាតិ ។ 

 គួរឲ្យដឹងថា ទីក្រុងម៉ូស្គូ តែងតែរងការវាយប្រហារដោយយានដ្រូនជាញឹកញាប់ ហើយរុស្ស៊ីអះអាងថា អ៊ុយក្រែនគឺជាអ្នកវាយប្រហារ ។  

ពេលសួរពីការវាយប្រហារដោយយានដ្រូនលើទីក្រុងម៉ូស្គូនៅក្នុងសន្និសីទសារព័ត៌មានរួមគ្នាជាមួយរដ្ឋមន្រ្តីការបរទេសអេស្តូនីលោក Margus Czavkna លោកស្រី Behrbock និយាយថា អ៊ុយក្រែនមានសិទ្ធិស្របច្បាប់ក្នុងការការពារខ្លួនឯង ពីព្រោះថាពួកគេរងការវាយប្រហារដោយរុស្ស៊ី ។ 

ដោយកត់សំគាល់ឃើញថា រុស្ស៊ីតែងតែបើកការវាយប្រហារឥតឈប់ឈរលើគោលដៅហេដ្ឋារចនាសម្ព័ន្ធស៊ីវិល ដូចជាជង្រុកគ្រាប់ធុញ្ញជាតិ មន្ទីរពេទ្យ និងព្រះវិហារនៅក្នុងប្រទេសអ៊ុយក្រែននោះ លោកស្រី Behrbock និយាយថា អ៊ុយក្រែនការពារខ្លួនឯងក្នុងដែនច្បាប់អន្តរជាតិ ។ 

ខណៈពេលនោះដែរ ក្រសួងការពារជាតិរុស្ស៊ី បាននិយាយថា ពួកគេបានបាញ់ទម្លាក់យានដ្រូនអ៊ុយក្រែន ២គ្រឿងនៅជិតទីក្រុងម៉ូស្គូ ហើយនិងបានបាញ់ទម្លាក់យានដ្រូន ២គ្រឿងទៀត នៅតំបន់ Bryansk ជាប់ព្រំដែនអ៊ុយក្រែន ។ 

យោងតាមការអះអាងរបស់អភិបាលតំបន់ទីក្រុងម៉ូស្គូ បានឲ្យដឹងថា មនុស្សយ៉ាងហោច ២នាក់ បានរងរបួស ពេលដែលបំណែកយានដ្រូនអ៊ុយក្រែនដែលត្រូវបំផ្លាញដោយប្រព័ន្ធការពារដែនអាកាសរុស្ស៊ី ធ្លាក់លើផ្ទះពួកគេ ៕