ស្របពេលដែលរលកកម្តៅវាយប្រហារទូទាំងតំបន់អឺរ៉ុបក្នុងរដូវក្តៅនេះ ធ្វើឲ្យសីតុណ្ហភាពនៅតាមទីក្រុងមួយចំនួនកើនឡើងដល់ជាង ៤០អង្សាសេ ស្ថានភាពអាកាសធាតុតែមួយត្រូវបានរកឃើញដូចគ្នានៅតំបន់ឈូងសមុទ្រអារ៉ាប់ ។ 

 ក្រុមព្យាករណ៍ឧតុនិយម ប្រើប្រាស់ឧបករណ៍រង្វាស់ឈ្មោះ Wet-Bulb ដើម្បីវាស់សីតុណ្ហភាពខ្យល់ និងសំណើមក្នុងខ្យល់ ។ 

 នៅអារ៉ាប់រួម ជាកន្លែងដែលសំណើមបរិយាកាសកើនឡើងលើសពី ៥០ភាគរយ ឧបករណ៍ Wet-Bulbបានរកឃើញសីតុណ្ហភាពក្នុងកម្រិតខ្ពស់ដ៏គ្រោះថ្នាក់ ដែលអាចធ្វើឲ្យប៉ះពាល់ដល់សុខភាពមនុស្ស ។ 

 លោក Eisa Al-Sereidi ដែលធ្វើការនៅមន្ទីរឧតុនិយមជាតិអារ៉ាប់រួមមានមូលដ្ឋាននៅទីក្រុង Abu-Dhabi និយាយថា សីតុណ្ហភាពមធ្យមដែលឧបករណ៍ Wet-Bulbវាស់ឃើញនៅអារ៉ាប់រួម មានចម្លោះពី ២៥ ទៅ ២៨អង្សាសេ ។ 

 លោកបន្តថា ជាការពិតណាស់ថា ពួកយើងមានការលើកលែងនៅតាមតំបន់មួយចំនួនជាកន្លែងដែលសំណើមខ្យល់ខ្ពស់ឈានដល់សីតុណ្ហភាពមធ្យម ៣៣អង្សាសេ ។ 

 សូមបញ្ជាក់ថា មន្ទីរឧតុនិយមជាតិអារ៉ាប់រួម បានវាស់កម្រិតសីតុណ្ហភាពដោយប្រើប្រាស់ឧបករណ៍ Wet-Bulbអស់រយៈពេលជាង ២ទសវត្សរ៍មកហើយ ៕