ប្រទេសហ្ស៊កដានីកាលពីថ្ងៃអង្គារ បានសង្កត់ធ្ងន់លើតម្រូវការសម្រាប់សហគមន៍អន្តរជាតិ ដើម្បីចាត់វិធានការជាក់ស្តែង និងជាបន្ទាន់ ដើម្បីបង្កើតកាលៈទេសៈចាំបាច់សម្រាប់ការវិលត្រឡប់ដោយស្ម័គ្រចិត្តរបស់ជនភៀសខ្លួនស៊ីរី។

ក្រសួងការបរទេសហ្ស៊កដានី បាននិយាយនៅក្នុងសេចក្តីថ្លែងការណ៍មួយថា រដ្ឋមន្ត្រីការបរទេសហ្ស៊កដានី លោក អាយម៉ាន សាហ្វាឌី (Ayman Safadi) បានលើកឡើងនៅក្នុងកិច្ចប្រជុំជាមួយឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន(UNHCR) លោក ហ្វីលីពប៉ូ ហ្គ្រានឌី ( Filippo Grandi) នៅទីក្រុងអាម៉ាន (Amman)ជាកន្លែងដែលលោកបានអំពាវនាវឲ្យក្រុមទីភ្នាក់ងារពាក់ព័ន្ធរបស់UNចាត់វិធានការបែបនេះ។

លោកសាហ្វាឌី បាននិយាយថា អនាគតរបស់ក្រុមជនភៀសខ្លួនស៊ីរី គឺស្ថិតនៅក្នុងប្រទេសរបស់ពួកគេ មិនមែននៅក្នុងប្រទេសហ្ស៊កដានីទេ ដោយបានបន្ថែមថា ការផ្តល់លក្ខខណ្ឌរស់នៅសមរម្យសម្រាប់ពួកគេ គឺមិនអាចខ្វះបាន។

ក្នុងជំនួបនោះ ភាគីទាំងពីរ បានពិភាក្សាអំពីលទ្ធផលនៃកិច្ចចរចានាពេលថ្មីៗនេះ ដែលធ្វើឡើងដោយព្រះរាជាណាចក្រនេះ និង UNHCR ជាមួយរដ្ឋាភិបាលស៊ីរីស្តីពីការផ្តល់ការធានាចាំបាច់ និងការបង្កើតហេដ្ឋារចនាសម្ព័ន្ធសំខាន់ៗសម្រាប់ការវិលត្រឡប់របស់ជនភៀសខ្លួន។

លោកសាហ្វាឌី និង លោកហ្គ្រានឌី ក៏បាននិយាយអំពី«ផលប៉ះពាល់ដ៏គ្រោះថ្នាក់»នៃការធ្លាក់ចុះនៃការគាំទ្រពីអន្តរជាតិសម្រាប់ជនភៀសខ្លួនស៊ីរី និងប្រទេសម្ចាស់ផ្ទះរបស់ពួកគេ ដើម្បីបន្តផ្តល់សេវាការរស់នៅ វេជ្ជសាស្ត្រ និងការអប់រំដល់ជនភៀសខ្លួន។