ការិយាល័យបោះឆ្នោត បានបើកហើយ នៅព្រឹកព្រលឹមថ្ងៃពុធ (ទី២៣ ខែសីហា) ខណៈប្រទេសហ្ស៊ីមបាបវ៉េ បានចាប់ផ្តើមការបោះឆ្នោតសកលឆ្នាំ២០២៣ របស់ខ្លួន។ ប្រជាពលរដ្ឋប្រមាណ ៦,៦លាននាក់ បានចុះឈ្មោះបោះឆ្នោត ក្នុងប្រទេស ដែលមានចំនួនប្រជាជនប្រមាណ ១៥លាននាក់។

ដំណើរការបោះឆ្នោត បានចាប់ផ្ដើមនៅម៉ោង ៧ព្រឹក (ត្រូវនឹងម៉ោង ៥ ម៉ោងសកល) ហើយត្រូវបិទនៅម៉ោង ៧យប់ (ត្រូវម៉ោង ១៧ ម៉ោងសកល)។ ប៉ុន្តែការិយាល័យបោះឆ្នោតមួយចំនួន នៅទីក្រុងហារ៉ារ៉េ (Harare) និងប៊ូឡាវ៉ាយោ (Bulawayo) ត្រូវបានគេរាយការណ៍ថា មានការពន្យារពេល ដោយសារមិនបានទទួលសន្លឹកឆ្នោត។

គណៈកម្មការរៀបចំការបោះឆ្នោតហ្សីមបាបវ៉េ បានទទួលស្គាល់ពីការកើតមានបញ្ហានេះ នៅក្នុងសេចក្តីថ្លែងការណ៍មួយ ហើយបានស្នើឲ្យមណ្ឌលទាំងនេះ ពិចារណាលើការពន្យារពេល ដោយសារអ្នកបោះឆ្នោត អាចត្រូវការពេលវេលាបន្ថែមទៀត ដើម្បីបោះឆ្នោត។

ការប្រណាំងប្រជែងតំណែងប្រធានាធិបតី គឺរវាងប្រធានាធិបតីបច្ចុប្បន្ន និងមេដឹកនាំគណបក្ស ZANU-PF លោក Emmerson Mnangagwa ( អឹមមើសិន អឹមណាន់កាក់វ៉ា) និងបេក្ខជន ១០នាក់ផ្សេងទៀត ក្នុងនោះរួមទាំងគូប្រជែងដ៏ធំរបស់លោក ដែលជាមេធាវី និងគ្រូគង្វាល លោក Nelson Chamisa របស់សម្ព័ន្ធពលរដ្ឋ ដើម្បីការផ្លាស់ប្តូរ (CCC)។

វាគឺជាការប្រកួតប្រជែងលើកទី២ រវាងបេក្ខជនលេចធ្លោទាំង២ បន្ទាប់ពីលោក Mnangagwa បានឈ្នះការបោះឆ្នោត ដែលមានការប្រកួតប្រជែងយ៉ាងកៀកកិត ក្នុងឆ្នាំ២០១៨ ដែលក្រុមប្រឆាំងចោទប្រកាន់ថា មានការក្លែងបន្លំ។ តុលាការធម្មនុញ្ញរបស់ប្រទេសនេះ បានរក្សាការពារការបោះឆ្នោតរបស់លោក Mnangagwa៕