ក្រុមអ្នកពន្លត់អគ្គិភ័យ បានប្រយុទ្ធនឹងចំហេះព្រៃនៅក្នុងខេត្ត Canakkale ភាគពាយព្យនៃប្រទេសទួរគី នៅថ្ងៃពុធ (ទី២៣ ខែសីហា) នេះ ខណៈដែលអណ្ដាតភ្លើតបានរាលដាលកាន់តែខ្លាំង សម្រាប់ថ្ងៃទី២ ដោយសារតែសីតុណ្ហភាពក្ដៅ និងខ្យល់បក់ខ្លាំង។

ឧទ្ធម្ភាគចក្រ និងរថយន្តជាច្រើនគ្រឿង បានធ្វើការងារពេញមួយយប់ ហើយរដ្ឋមន្ត្រីក្រសួងមហាផ្ទៃ លោក Ali Yerlikaya បាននិយាយថា មនុស្សជាង ១.២០០នាក់ មកពីភូមិចំនួន៩ ត្រូវបានជម្លៀសទៅកាន់ទីសុវត្ថិភាព ដោយមានមនុស្ស ៤៨នាក់ ត្រូវការការព្យាបាល។

ជាមួយគ្នានេះ អាជ្ញាធរក៏បានផ្លាស់ប្ដូរកន្លែងអ្នកជំងឺ ក្នុងនោះរួមទាំងមនុស្សចាស់ផងចេញពីមណ្ឌលវេជ្ជសាស្រ្តមួយចំនួន ដើម្បីជាការប្រុងប្រយ័ត្ន។ ខ្សែវីដេអូព័ត៌មាន បានបង្ហាញពីកម្ពស់អណ្ដាតភ្លើងដែលកំពុងរាលដាល និងផ្សែងហុយយ៉ាងខ្មួលខ្មាញ់ចេញពីភ្នំ ដែលអាចមើលឃើញពីតំបន់លំនៅឋាន។ អណ្តាតភ្លើងបានឆាបឆេះផ្ទះក្នុងភូមិមួយចំនួន ដែលត្រូវបានបោះបង់ចោល។

ទីភ្នាក់ងារដឹកជញ្ជូន Tribeca បានឲ្យដឹងថា ចរាចរផ្លូវសមុទ្រ នៅច្រកសមុទ្រ Dardanelles ដែលជាផ្លូវទឹកដ៏តូចចង្អៀតតភ្ជាប់ពីសមុទ្រ Aegean ទៅសមុទ្រខ្មៅ ត្រូវបានផ្អាកម្តងទៀត ដើម្បីអនុញ្ញាតឲ្យយន្តហោះ រួមទាំងឧទ្ធម្ភាគចក្រទៅយកទឹកមកស្រោចពន្លត់អណ្ដាតភ្លើង៕