ចិន៖ ប្រធានាធិបតីចិន លោក ស៊ី ជិនពីង និយាយថា ប្រទេសចិនគាំទ្រការទាមទារសមហេតុផល ទាក់ទងទៅនឹងផែនការសកម្មភាពគ្រប់ជ្រុងជ្រោយរួម លើបញ្ហានុយក្លេអ៊ែរអ៊ីរ៉ង់ និងត្រៀមខ្លួនជាស្រេច ដើម្បីពង្រឹងការសម្របសម្រួលជាមួយអ៊ីរ៉ង់ និងការពារផលប្រយោជន៏រួមរបស់ភាគីទាំងពីរ។
លោក ស៊ី ជិនពីង បាននិយាយដូច្នេះក្នុងកិច្ចសន្ទនាតាមទូរស័ព្ទ ជាមួយប្រធានាធិបតីអ៊ីរ៉ង់ លោក ហាសាន រ៉ូហានី។ លោកបានគូសបញ្ជាក់ថា ប្រទេសចិន និងអ៊ីរ៉ង់បានគាំទ្រ និងជួយគ្នាក្នុងពេលលំបាកដើម្បីប្រយុទ្ធប្រឆាំងការឆ្លងរាលដាលជំងឺកូវិត-19 និងលទ្ធផលវិជ្ជមានដែលទទួលបានដោយការជំរុញកិច្ចសហប្រតិបត្តិការជាក់ស្ដែង។ នៅឆ្នាំនេះជាខួប ៥០ឆ្នាំនៃការបង្កើតទំនាក់ទំនងការទូតរវាងប្រទេសចិន និងអ៊ីរ៉ង់ លោក ស៊ី ជីនពីង និយាយថា ប្រទេសទាំងពីរស្ថិតនៅក្នុងចំណុចប្រវត្តិសាស្ត្រដ៏សំខាន់ ដែលភាគីទាំងពីរនឹងឆ្ពោះទៅមុខលើមូលដ្ឋានសមិទ្ធផលកន្លងមក។ លោក ស៊ី និយាយថា ចិននឹងគាំទ្រប្រទេសអ៊ីរ៉ង់ក្នុងការការពារអធិបតេយ្យរដ្ឋ និងភាពថ្លៃថ្នូររបស់ប្រទេស ហើយរីករាយបន្តផ្តល់ជំនួយក្នុងសមត្ថភាពរបស់ខ្លួន ដើម្បីជួយអ៊ីរ៉ង់ប្រយុទ្ធប្រឆាំងជំងឺរាតត្បាត និងជួយប្រជាជនអ៊ីរ៉ង់យកឈ្នះការប្រឆាំងជំងឺកូវិត-19។ ទន្ទឹមនឹងនេះ ចិននឹងបន្តដើរតួនាទីស្ថាបនាសំខាន់ ក្នុងការធ្វើឲ្យប្រសើរនូវដំណោះស្រាយនៃវិបត្តិប៉ាឡេស្ទីន។
ប្រធានាធិបតីអ៊ីរ៉ង់ លោក រ៉ូហានី និយាយថា ចាប់តាំងពីការបង្កើតទំនាក់ទំនងការទូតរយៈពេល ៥០ឆ្នាំមកនេះ ប្រទេសអ៊ីរ៉ង់ និងចិនមានកិច្ចសហប្រតិបត្តិការជិតស្និត ហើយប្រទេសអ៊ីរ៉ង់ប្រកាន់ភ្ជាប់គោលនយោបាយចិនតែមួយ និងគាំទ្រប្រទេសចិនក្នុងការការពារអធិបតេយ្យភាពជាតិ និងដែនដី។ អ៊ីរ៉ង់នឹងពង្រឹងកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម ថាមពល និងវិស័យជាច្រើនទៀត និងជំរុញការស្ថាបនារួមគំនិតផ្ដួចផ្ដើមខ្សែក្រវាត់ និងផ្លូវ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
