ភ្នំពេញ៖ ឯកឧត្តម កែវ រតនៈ រដ្ឋមន្រ្តីក្រសួងរ៉ែ និងថាមពល ថ្លែងនូវការប្តេជ្ញាចិត្តខ្ពស់ បន្តដឹកនាំមន្រ្តីស្ថិតនៅក្រោមឱវាទក្រសួង ខិតខំប្រឹងប្រែងអនុវត្តការងារទៅតាមមុខជំនាញ ជាពិសេសការបន្តជំរុញអភិវឌ្ឍន៍វិស័យរ៉ែ ប្រេងកាត និងវិស័យអគ្គិសនីឲ្យកាន់តែរីកច្រើន ស័ក្ដិសម​ជាកូនចៅ និងអ្នកបន្តវេនជំនាន់ក្រោយ។

ឯកឧត្តម កែវ រតនៈ រដ្ឋមន្រ្តីក្រសួងរ៉ែ និងថាមពល នៅក្នុងអាណត្តិថ្មីនេះ បានលើកឡើង​នៅ​ក្នុងពិធីជំនួបរវាងថ្នាក់ដឹកនាំ ជាមួយមន្រ្តីរាជការក្រសួងរ៉ែ ​និងថាមពល នៅថ្ងៃទី ២៣ ខែសីហា ឆ្នាំ ២០២៣ នេះថា នាពេលកន្លងមកនេះ សម្តេចអគ្គមហាសេនាបតីតេជោ ហ៊ុន សែន បានផ្តល់​ការ​គាំទ្រ​ដល់ក្រសួងរ៉ែ និងថាមពល ដែលស្ថិតក្រោមការដឹកនាំរបស់ឯកឧត្តម ស៊ុយ សែម អតីតរដ្ឋមន្រ្តី​ក្រសួងរ៉ែ និងថាមពល និងឯកឧត្តមផ្ទាល់ និងអាជ្ញាធរអគ្គិសនីកម្ពុជា រួមជាមួយ​មន្រ្តីរាជការទាំងអស់ បានទទួលលទ្ធផលជាផ្លែផ្ការីកចម្រើន​គួរឲ្យគត់សម្គាល់​ នៅក្នុងក្របខណ្ឌ ភារកិច្ច ដែលក្រសួងរ៉ែ និងថាមពលបានគ្រប់គ្រង។

ជុំវិញវិស័យអគ្គិសនី ឯកឧត្តម បន្តថា បន្ទាប់ពីកម្ពុជាក្រោមគោលនយោបាយ ឈ្នះ-ឈ្នះ របស់​សម្តេចអគ្គមហាសេនាបតីតេជោ ហ៊ុន សែន ដែលបានផ្តល់នូវសុខសន្តិភាព វិស័យអគ្គិសនី​បានកើតឡើង​ជាបន្តបន្ទាប់ ក្នុងនោះថាមពលស្អាត ​ឬថាមពលកកើត ឡើងវិញ បានអភិវឌ្ឍន៍​ឡើងជាបន្តបន្ទាប់ផងដែរ រហូតមកដល់ពេលនេះ វិស័យអគ្គិសនីនៅកម្ពុជាបានកំពុងឆ្លើយតប​និងតម្រូវការប្រើ ប្រាស់របស់ប្រជាពលរដ្ឋ ​និងការផ្គត់ផ្គង់ដល់រោងចក្រ ​សហគ្រាសក្នុងស្រុក។

ចំណែកវិស័យរ៉ែ ក្រោមការគ្រប់គ្រង ដឹកនាំរបស់ឯឧត្តម អតីតរដ្ឋមន្រ្តីចាស់ ក៏មានការវិវត្តន៍​រីកចម្រើន​គួរឲ្យកត់សម្គាល់ ​បច្ចុប្បន្នវិស័យកំពុងប្រមូលចំណូលចូលថវិការជាតិ ។ ដោយឡែកវិស័យប្រេងកាត ​ឯឧត្តម ស៊ុយ សែម​ ក៏បានខិតខំប្រឹងប្រែងយ៉ាងខ្លាំងផងដែរ នៅក្នុង​អាណត្តិ​របស់ឯឧត្តមដឹកនាំផ្ទាល់ ទោះបីមិនទាន់ឈានដល់ការសម្រេចជោគជ័យទាំង​ស្រុកក៏ដោយ។

ជុំវិញបញ្ហានេះ, ឯកឧត្តម កែវ រតនៈ រដ្ឋមន្រ្តីក្រសួងរ៉ែ និងថាមពល ដែលទើបតែងតាំងថ្មី បានថ្លែង​នូវការប្តេជ្ញាចិត្តខ្ពស់ បន្តខិតខំប្រឹងប្រែងឲ្យអស់លទ្ធភាព ​និងសាមគ្គីភាពជាធ្លុងមួយ ដើម្បីបន្តដឹកនាំ​មន្រ្តីដែលស្ថិតនៅក្រោមឱវាទក្រសួងទាំងអស់ ឲ្យបន្តខិតខំប្រឹងប្រែងអនុវត្តការងារ​ទៅតាមមុខ​ជំនាញរបស់ខ្លួន ​ជាពិសេសការជំរុញអភិវឌ្ឍន៍វិស័យរ៉ែ ​ប្រេងកាត​ និងវិស័យអគ្គិសនីនៅកម្ពុជា ឲ្យកាន់រីកច្រើន​ ស័ក្ដិសម​ជាកូនចៅ​ និងអ្នកបន្តវេនជំនាន់ក្រោយ៕អត្ថបទ៖ សុន រ៉ាឌី