កូរ៉េខាងត្បូង៖ ទាហានអាមេរិក និងកូរ៉េខាងត្បូង កាលពីថ្ងៃពុធ (២៣ សីហា) បានធ្វើសមយុទ្ធហ្វឹកហ្វឺននៅក្នុងទីតាំងនានា ដែលត្រូវបានរចនាឡើងដើម្បីប្រៀបប្រដូចការពិតនៃបរិយាកាសទីក្រុងមានប្រជាជនច្រើន ដែលជាផ្នែកមួយនៃសមយុទ្ធឈ្មោះខែលការពារសេរីភាពអ៊ុលឈី (Ulchi Freedom Shield) ប្រចាំឆ្នាំ។

សមយុទ្ធរួម ដែលបានចាប់ផ្តើមកាលពីថ្ងៃចន្ទ (២១ សីហា) ត្រូវបានរៀបចំឡើងដើម្បីបង្កើន និងកែលម្អការឆ្លើយតបទៅនឹងការគំរាមកំហែងមីស៊ីល ឬនុយក្លេអ៊ែររបស់កូរ៉េខាងជើង។ 

កងទ័ពកូរ៉េខាងត្បូងបាននិយាយថា សមយុទ្ធនេះក៏មានគោលបំណងធ្វើឱ្យប្រសើរឡើងនូវជំនាញប្រយុទ្ធជាក់ស្តែង និងបង្កើនសមត្ថភាពរបស់កងកម្លាំងរួម ក្នុងការអនុវត្តប្រតិបត្តិការបង្រួបបង្រួមក្នុងតំបន់ទីក្រុងផងដែរ។

យោធាកូរ៉េខាងត្បូងបាននិយាយថា សមយុទ្ធនៅឆ្នាំនេះនឹងត្រូវបានធ្វើឡើងនៅលើ «ទ្រង់ទ្រាយធំបំផុតមិនធ្លាប់មាន» ដោយមានការចូលរួមពីទាហានរាប់ម៉ឺននាក់មកពីភាគីទាំងពីរ។ រដ្ឋធានីព្យុងយ៉ាង បានរិះគន់សមយុទ្ធយោធារបស់សម្ព័ន្ធមិត្តទាំងពីរនេះថា ជាការហាត់សមសម្រាប់សង្គ្រាមនុយក្លេអ៊ែរ៕